«Буойун» киин Арассыыйатааҕы бойобуой ускуустуба сойууһун кытта бииргэ оҥорбут «Бэйэни көмүскэнии. 1 таһым» диэн эбии уопсай сайдыы бырагырааматын киллэрдэ.
«Арассыыйа бэрэсидьиэнэ Владимир Путин сорудаҕынан тэриллибит «Буойун» киин сыала-соруга: биһиги уолаттарбытын уонна кыргыттарбытын эт-хаан, өй-санаа өттүнэн күүстээх оҥоруу, кинилэри кытта дойдубут эмиэ күүһүрэр. Ол эрээри, саамай сүрүнэ, бу күүстээх буолуу эрэ буолбатах, Ийэ дойдуну таптыыр, Арассыыйанан киэн туттар, дойду уонна олохтоохторун интэриэстэрин көмүскүүр кыахтаах буолуу. Биллэн турар, бэлэмнэнии дьарыктаах буолуохтаах. Мин Киин инструктордарын да, курсааннары кытта хаста да көрсүбүтүм, устудьуоннары дьарыктыыр дьон хайдах курдук дьаныардаахтарын, дьулуурдаахтарын, устудьуоннар хайдах курдук саҥаны билэргэ дьулуһалларын, ньыгыл хамаанда буолалларын билбитим», — диэн Юрий Трутнев эттэ.
Бэйэни көмүскэнэр бырагыраама «Буойун» киин дириэктэрэ Дмитрий Шевченко салайааччылаах педагогическай сэбиэтинэн бигэргэтиллибитэ уонна салгыы олоххо киллэриигэ Арассыыйа 21 эрэгийиэнигэр баар Киин бары салааларыгар тарҕаммыта.
«Биһиги курсааннары бэлэмниир систиэмэбитин өрүү сайыннарабыт. Кини 14-тэн 35-гэр диэри саастаах курсааннарга ананар уонна 36 үөрэх чааһын ылар. Арассыыйатааҕы бойобуой ускуустуба сойууһун кытта бииргэ үөрэнээччилэри эт-хаан өттүнэн эрэ буолбакка, киһи уйулҕатын өйдүүргэ уонна күүһү сөпкө туһанарга үөрэтэбит. Курсааннар кутталы сыаналыырга, ырааҕы-чугаһы хонтуруоллуурга, ол иһигэр сэбилэниилээх утарсааччыны утары сөптөөх көмүскэнэр ньымалары туһанарга үөрэнэллэр. Бу бэйэлэрин уонна дойдуларын көмүскүөн баҕалаах эдэр дьоҥҥо олус наадалаах дьоҕурдар», — диэтэ Дмитрий Шевченко.
Бырагыраама хас да чаастаах: сүрүн техническэй элеменнэртэн, сэрии ньымаларыттан уонна сэбилэниилээх утарсааччыга бэйэни көмүскэнэр ньымаларыттан (кылгас уонна уһун мас, быһах, бэстилиэт, пулемет), баһылаабыт ньымалары пааранан холбоон оҥорууга тиийэ. Ордук болҕомто патриотическай иитиигэ ууруллар, курсааннарга Аҕа дойду көмүскэлигэр тус эппиэтинэһи уонна дойдуларыгар сулууспалыырга бэлэм буолууну иҥэрэллэр.
«ВОИН» киин 2022 сыл ахсынньы 1 күнүгэр РФ Бэрэсидьиэнин дьаһалынан тэриллибитэ, соруктара — дойдуларын таптыыр, хайдах көмүскүүрү билэр саҥа көлүөнэ патриоттары иитэн таһаарыы. Киин салаалара Арассыыйа 21 эрэгийиэнигэр үлэлииллэр, бары федеральнай уокуруктары уонна историческай территориялары хабаллар.
Саха сиригэр Киин эрэгийиэннээҕи салаата аһыллыаҕыттан ыла 4000-тан тахса курсаан үөрэҕи ааспыт. Үлэ сүрүн хайысхаларыгар сылы эргиччи курсааннары олордор саҥа дьиэни тутуу, инструктордар квалификацияларын үрдэтии, улахан күрэхтэһиилэри уонна тэрээһиннэри ыытыы киирэллэр. 2025 сылга Саха сирин «Боотур» хамаандата Бүтүн Арассыыйатааҕы «Путь ВОИНа» куонкуруска 1-кы миэстэни ылбыта.