Муус устар 28 күнүгэр Арчы дьиэтигэр Иван Николаевич Николаев-Уххан айымньылаах олоҕун уонна иэйиилэрин хоһуйбут хоһооннорун түмэн таһаартаабыт кинигэлэрин билиһиннэрдэ.
Ырыа буолан кынаттаммыт хоһоонноро уонна ол ырыалары толорбут саха эстрадатын артыыстара ыллаан үйэтитиилэрэ олоххо тардыһыыга, төрөөбүт тыл алыбыгар, тапталга, актыыбынай олоххо угуйар күүстээҕин итэҕэтэр.
Уйбаан Уххан саха култуурата сайдарыгар элбэх ырыалаах улахан кэнсиэртэри туруоран, айымньыларын норуотугар билсиһиннэрэн ааспытын туһунан бары сөҕөн санааларын этэн, махтанан тарҕаспыттарын өйдүүбүт.
Саха саарба тыллардаах хоһоонноро, кини поэзиятын тыла дьикти күүстээхтэр. Хоһоонугар эппитин курдук, саха саарба тыллара — сүрэҕин эмчиттэрэ. Айымньылара уус-уран сытыы тыллаахтар, саха күндү тылын сонордьуттара.
«Айар Кут Сойуус» эрэгийиэннээҕи сэһэнньиттэр уонна хоһоонньуттар сойуустарын чилиэннэрэ санааларын эттилэр. Уххан Уйбаан хоһоонньуттарга сөптөөх сүбэлэрин үллэстэригэр махтаннылар.
Кэкэрдэ Зоя уонна Аана Кыыһа бэйиэт Уххан “Саха саарба тыллара” уонна «Учууталга уруй буоллун» диэн хоһооннорун аахтылар.
Эстрада биллиилээх ырыаһыта, продюсер, «Сахафильм» хампаанньа дириэктэрэ Алексей Алексеевич Егоров-Өркөн бэйиэт Уххан хоһоонун тылларыгар хит буолбут ырыаларын иһитиннэрдэ.
СӨ норуодунай артыыһа, ырыаһыт, ырыа айааччы Алексей Васильевич Егоров мааны ыалдьыт буолан, Уххан хоһоонугар айбыт ырыаларын быһа тардан мустубут дьоҥҥо иһитиннэрдэ.
Алексей Васильевич Уххан хоһооннорун уус-уран тыллара барҕа баайынан, үлүһүтэр эрчиминэн, ханна да хатыламмат энчирээбэт сүдү күүһүнэн уонна саха литературатыгар ханна да суох улахан суруйууларынан саха норуодунай бэйиэтэ буоларын билинэр кэм кэлбитин эттэ. Кинини кытары өр сыл айымньылаах үлэлэринэн алтыһан, доҕордоһон кэлбиттэрин санатан, ырыа айыыттан араас түгэннэри кэпсээтэ.
Биир улахан үлэлэринэн буолар “Журавли над Ильменем” киинэҕэ саундтрек суруйбуттарын уонна Уххан тылларыгар үс тыйаатырга тэҥинэн тэрээһин ыытар ухханнаах кэмнэрин санаан ааста.
Салгыы ыҥырыылаах ыалдьыт, саха дьонугар биллэр киһи Санаайа үтүө тыллары анаата, олоҕор олук алгыстары эттэ. Сахалыы тыыннаах, киһини толкуйдатар умсулҕаннаах уһун кэпсэтиигэ бириэмэ барбытын билбэккэ, Уххан Уйбаан айымньыларын дорҕоонноохтук ааҕарын дуоһуйа иһиттибит.
КЭКЭРДЭ ЗОЯ
