2025 сыл ахсынньы 15 күнүгэр Дьокуускай куоракка “Патриот” ыччат элбэх хайысхалаах киинэ Ил Дархан Айсен Николаев сорудаҕынан аһыллыбыта. Киин ыччаты патриоттуу тыыҥҥа иитии бары көрүҥнэрин сүрүннүүр, ыччат көҕүлээһиннэрин өйүүр, кинилэр уопсастыба олоҕор көхтөөхтүк кыттар эйгэлэрин тэрийэр аналлаах.
— Сулустаан Владимирович, Ил Дархаммыт Айсен Николаев эн байыаннай дьайыыттан кэлээккин кытары “Патриот” кииҥҥэ салайааччынан анаабыта. Үлэни саҕалааһын кэмнэрин ахтан-санаан аастахха, хайдах этэй?
— Мин бэйэм байыаннай дьайыыттан былырыын ыам ыйыгар кэлбитим. Бу кииҥҥэ дириэктэринэн ананарбар өссө да тутуу, өрөмүөн буола турара. 202‑с микро-оройуоҥҥа “Бригантина” урукку дьиэтэ 2008 сылтан туох да өрөмүөнэ суох таах турбут этэ. Аукцион тэрийэн, өрөмүөн хайдах ыытылларыгар быһаччы кыттыспытым, барытын көрө-истэ сылдьыбытым. Ол иһин ханна туох итэҕэс-быһаҕас тахса сыспытын, хас холуода, үктэл баарын барытын ааҕа билэбин диэххэ сөп. Ыччат, Тутуу министиэристибэлэрин, Судаарыстыбаннай сакаасчыт сулууспатын, технадзору кытары кэмитиэт тэриммиппит. Онон кинилэр бары көмөлөспүттэрэ. Тутуу этэҥҥэ ахсынньы 1 күнүгэр түмүктэммитэ.
Эбийиэкпит 3275 квадратнай миэтэрэ иэннээх. Сорохтор бу 12 мэндиэмэн барыта биһиэнэ буоларын курдук саныыллар. Оннук буолбатах. Биһиги 2‑с уонна 3‑с этээстэргэ олохсуйан үлэлии-хамсыы олоробут.
“Патриот” кииҥҥэ биһиги ыччаттарбыт сайдалларыгар, бэйэ-бэйэлэрин кытары алтыһалларыгар, толкуйдаабыт бырайыактарын олоххо киллэрэллэригэр, иннилэрин диэки эрэллээхтик хардыылыылларыгар сөптөөх усулуобуйа барыта баар. Коворкинг-киин, кибер-эйгэ, видеороликтары уонна подкастары устар зоналар, айар дьарыктарга аналлаах устуудьуйалар, быыстапка зоната, успуорт уонна тренажер саалалара, көмпүүтэр кулууба, кэнсиэртэри, кэмпириэнсийэлэри, араас кэпсэтиилэри ыытар саалалар, мастарыскыайдар ааннара ыччаттарга аһаҕас. Эдэр төрөппүттэр оҕолорун илдьэ кэллэхтэринэ, ийэ уонна оҕо хоһо, оҕо оонньуур зоната бааллар.
-Байыаннай дьайыыттан кэлбит уолаттарбыт доруобуйаларын чөлүгэр түһэрэллэригэр эмиэ улахан көмөнү, өйөбүлү оҥорор буолуохтааххыт?
— Судаарыстыба көмөтө улахан. Ханнык баҕарар байыас “Защитники Отечества” (“Дойдуну көмүскээччилэр”) судаарыстыбаннай пуондаҕа быһаччы кэлэр кыахтаах. Кинилэр эрэгийиэннэргэ баар санаторийдарга 21 күн устата сынньаныахтарын, доруобуйаларын бөҕөргөтүнүөхтэрин сөп. Санаторий, эмтэнии, айан ороскуота барыта төлөнөр. Уолаттар бары доруобуйаларын чөлүгэр түһэринэр, психолог өҥөтүнэн туһанар кыахтаахтар.
Манна даҕатан биири этиэхпин баҕарабын. Сорох дьон байыаннай дьайыыга сылдьыбыт уолаттар дойдуларыгар кэлэн баран арыгынан эрэ аһарыналларын курдук олох сыыһа саныыллар. Төттөрүтүн, үгүстэр олохторун дьиэ кэргэттэригэр аныыллар, кинилэрдиин эрэ бииргэ буолар туһугар олох олороллор. “Араас санаалар киирэллэр, куһаҕаны төнүннэриэхпитин баҕарбаппыт. Онон арыгыны испэппит, уопсастыба олоҕор кыттыһыахтаахпыт” диэн бигэ санаалаахтар, ону аһаҕастык этэллэр.
Бэтэрээннэрбит үлэ булалларыгар көмөлөһөбүт. Киһи дьылҕата диэн араас, урут сууттана сылдьыбыттар суох буолбатахтар. Кинилэри үлэҕэ ылыахтарын баҕарбаттара эмиэ баар. Оттон уолаттар олохтоох үлэтэ суохтарыттан, кыра хамнастаах эрэ үлэ баарыттан санааҕа-онооҕо түһүөхтэрин сөп. Онон ити кыһалҕаны быһаарарга үлэлэһэбит.
(Сиһилии «Саха сирэ» хаһыат 08.05.26 күнүнээҕи нүөмэригэр аах)