Чурапчы оройуонун полиция отделын дьуһуурунай чааһыгар баан каартатыттан харчытын уордарбыт дьахтартан сайабылыанньа киирбит. Биллибэт дьон 16 500 солк. уорбуттар.
Суһал-ирдиир үлэ кэмигэр холуобунай ирдэбил үлэһиттэрэ уорбаланааччы ким буоларын уонна ханна баарын быһаарбыттар. Ол курдук, 40 саастаах Ньурба улууһуттан төрүттээх эр киһи эбит.
Быһаарыллыбытынан, уорбаланааччы Дьокуускайтан Чукоткаҕа айанныырга иккис дальнойбойщик-суоппарга наадыйабыт диэн биллэриини көрбүт. Туһааннаах үлэҕэ сөбүлэһэн, эр киһи Дьокуускайтан Чурапчыга барбыт. Кинини онно атын суоппар көрсүбүт уонна аймаҕа дьахтарга хонноро аҕалбыт. Уорбаланааччы ыалга хоно сытан хаһаайка каартатын бэлиэтии көрбүт уонна уоран ылбыт.
Аныгыс күнүгэр эр дьон ыраах айаҥҥа туруммуттар. Өймөкөөҥҥө тиийэн баран, уорбаланааччы салгыы айанныыртан кыккыраччы аккаастаммыт. Айантан салынным диэбит. Итиэннэ таксыы сакаастаан баран, Дьокуускайга төннөн кэлбит. Кэлэн баран уон күн устата атын киһи каартатынан туһаммыт. Харчыны арыгыга, аска-үөлгэ бараабыт.
Билигин эр киһиэхэ РФ Холуобунай кодексын 158 ыст. 2 ч. холуобунай дьыала көбүтүллүбүт.