Бүгүн 11-с уонна 9-с кылаастар эксээмэннэригэр аналлаах, үгэскэ кубулуйбут пресс-кэмпириэнсийэ буолан ааста. Тэрийээччилэр иһитиннэрбиттэринэн, бу сылга Саха сиригэр барыта 23 309 киһи эксээмэни туттарыаҕа.
Судаарыстыбаннай түмүктүүр аттестацияҕа диэри биир нэдиэлэ хаалла, бу хас биирдии оскуоланы бүтэрээччигэ суолталаах түһүмэх буоларын өйдүүбүт диэн Үөрэх хаачыстыбатын кэтээн көрөр киин дириэктэрэ Надежда Попова бэлиэтээтэ.
Үөрэх уонна билим миниистирэ Нюргуна Соколова иһитиннэрбитинэн, быйыл биир кэлим эксээмэни 8225 (былырыын 8283), сүрүн судаарыстыбаннай эксээмэни 15 084 (былырыын 14 864) оҕо туттарыаҕа.
“Биһиги номнуо төрдүс сылын, оскуоланы бүтэрээччилэрбитигэр кэскиллээх буоларын, биридимиэттэрин талалларыгар, үрдүк эбэтэр орто үөрэххэ киирэллэригэр эрдэттэн сөпкө туһаайар уонна үлэ булалларын туһугар хайысханан үөрэтиини киэҥник тарҕатабыт. Маны сөпкө дьүөрэлиир инниттэн былаан ылыныллыбыта. Ол иитинэн үрдүк үөрэххэ өрөспүүбүлүкэ экэниэмикэтигэр ирдэнэр хайысхаларга туттарсарга ирдэнэр биридимиэттэри талалларыгар туһаайабыт. Өскөтүн кэлиҥҥи сылларга физиканы, уустугурдуллубут математиканы, химияны, биологияны талар оҕо аҕыйах эбит буоллаҕына, оскуолалары кытта ити ыытыллыбыт үлэ түмүгэр, быйыл талар оҕо ахсаана элбээтэ. Бырыһыанынан көрдөххө улаханнык биллибэт курдугун иһин, ахсаанынан ылан көрдөххө, көстөр” – диэн миниистир эттэ. Билигин 9-с кылааска 11-с кылааска талыахтаах биридимиэттэрин туттарар үлэни ыыталлар эбит. Холобур, 9-с кылааска физиканы талбыт буоллаҕына, туохха сыыспытын көрөн, көннөрүнэн, икки сыл устата өссө бэлэмнэнэн 11-с кылааска эмиэ таларын эбэтэр хайысхатын уларытарын курдук үлэлэһэллэр. “Технологическай, естественнэй-научнай уонна агро-технологическай хайысхалары федеральнай таһымҥа кэтээн көрөллөр” – диэн миниистир бэлиэтээтэ.
9-с кылаас үөрэнээччитэ кыайан эксэмээнэнин туттарбатаҕына оробуочай идэҕэ үөрэнэр кыахтааҕы туһунан быйыл элбэхтик этилиннэ. “Өскөтүн 9-с кылаас үөрэнээччитэ эксээмэннэрин хаттаан туттаран баран кыайан аттестат ылбатаҕына, судаарыстыба бастакы оробуочай идэтин ыларын хааччыйыаҕа. Кыайан туттарбатах оҕо ахсаана аҕыйах буоларыгар эрэнэбит. Ол эрээри, хомойуох иһин, сүрүн, эбии түһүмэхтэр кэнниттэн кыайан туттарбакка, аттестат ылбатах түгэннэрэ баар буолааччы. Ол гынан баран, эһиилигэр хаттаан туттараларын курдук 9-с кылаас бырагырааматыгар иккистээн үөрэтэллэр. Билигин маны сэргэ оробуочай идэҕэ үөрэниэхтэрэ. Хас оҕо үөрэнэрэ балаҕан ыйыгар биирдэ биллиэҕэ” – диэн Нюргуна Соколова иһитиннэрдэ.
Үөрэх хаачыстыбатын кэтээн көрөр киин дириэктэрэ Надежда Попова быһаарбытынан, 11-с кылаас үөрэнээччилэрэ аттестат ылалларыгар оҕолор оскуола бырагырааматын билэллэрэ, түмүктүүр өйтөн (ахпыттан) суруйууга зачет ылаллара уонна сүрүн биридимиэттэргэ – нуучча тылын уонна математиканы ирдэниллэр алын баалга туттараллара наада.
“Ааспыт сылга курдук быйыл эмиэ путинскай күннэр бааллар. От ыйын 8, 9 күннэригэр оҕолор биир биридимиэти талан эксээмэннэрин хаттаан туттаран, түмүктэрин тупсарыахтарын сөп. Ол гынан баран, бастакы эксээмэн баала иккистээҕэр үрдүгүн да иһин, сотуллар” – диэн дириэктэр быһаарда. Быйылгы эксээмэн туттарааччыларга ситиһиилэри баҕарабыт диэн түмүккэ тэрийээччилэр эттилэр.
