Бу күннэргэ Владивосток куоракка «Арассыыйа» национальнай кииҥҥэ Уһук Илиннээҕи «Түмүк баар» («Есть результат!») пуорум ыытылынна.
Бу тэрээһин чэрчитинэн «Биир ньыгыл Арассыыйа» баартыйа дьахталларын хамсааһынын бэрэстэбиитэллэрэ РФ Федеральнай Мунньаҕын Федерациятын Сэбиэтин бэрэссэдээтэлин бастакы солбуйааччыта, баартыйа Генеральнай сэбиэтин сэкирэтээрэ Владимир Якушевтыын көрүстүлэр.
Пуорумҥа саха дьахталларын дэлэгээссийэтэ кыттыытын туһунан Нам улууһун Хатырык нэһилиэгинээҕи Култуура дьиэтин иһинэн үлэлиир «Кто, если не мы!» кулууп салайааччыта Елена Ефремова маннык сырдатта:
— Суолталаах тэрээһиҥҥэ Саха сиринээҕи дьахталлар хамсааһыннарын дэлэгээссийэтин СӨ Дьахталларын тэрилтэлэрин сойууһун бэрэссэдээтэлэ, СӨ Уопсастыбаннай балаататын аппараатын салайааччыта Анжелика Андреева салайан илдьэ сылдьар.
Дэлэгээссийэ састаабыгар «Дьахталлар оҥорбуттара» («Сделано женщинами») Бүтүн Арассыыйатааҕы марафон өрөспүүбүлүкэтээҕи этаабын кыайыылаахтара бааллар. Мэҥэ Хаҥалас улууһун, Майа сэлиэнньэтин дьахтар сэбиэтин чилиэнэ Жанна Тумусова, «Өбүгэлэр оонньуулара» дьахталлар спартакиадаларын кыттыылааҕа Кэскилээнэ Петрова, Таатта улууһун киин балыыһатын кылаабынай бырааһа Сардаана Кононова, ХИФУ «Моя семья -мой СВФУ» Координационнай киин салайааччыта Саргылаана Нестерова бэйэлэрин бырайыактарын Уһук Илин федеральнай уокурук таһымыгар бэрт үрдүк таһымнаахтык сырдаттылар.
Саха сирин көхтөөх, айар куттаах кэрэ хотуттарыгар өссө да үрдүк ситиһиилэри, саҥа саҕахтары баҕаран туран, мин кинилэри кытта бииргэ бу суолталаах тэрээһиҥҥэ кытта сылдьарбынан олуһун киэн туттабын. Саха сирин дьахталларын хамсааһына — сайдыы уонна сомоҕолоһуу тирэҕэ!