Өлүөхүмэ улууһугар полиция үлэһиттэрэ 400 тыһ.солк. суумалаах уорууга уорбаланар икки дьахтары туттулар. Уратыта диэн, кинилэр биир киһи суумкатыттан тус-туспа күн, бэйэ-бэйэлэриттэн тутулуга суох уорбуттар.
Дьокуускайтан төрөөбүт дойдутугар, Өлүөхүмэҕэ, аймахтарыгар ыалдьыттыы кэлбит дьахтар төннөрүгэр дьүөгэтин дьиэтигэр хаалбыт. Көрсүһүүнү бэлиэтээн, дьон мустубут.
Бастакы уоруу. Остуол тула олоруу кэмигэр 29 саастаах олохтоох дьахтар ыалдьыт суумкатыгар көмүс киэргэллэрин уктубутун көрөн хаалбыт. Түүн хаһаайка утуйбутун туһанан, суумкаттан көмүс сыаптаах кулуону ылан баран дьиэтиттэн барбыт.
Иккис уоруу. Икки хонугунан ол суумканы атын ыалдьыт — Булуҥтан төрүттээх 44 саастаах дьахтар бэлиэтии көрбүт. Кини суумка ис сиэбиттэн 285 тыһыынча солкуобай харчыны булан ылан, бэйэтин дэриэбинэтигэр куоппут.
Эмсэҕэлээбит дьахтар полицияҕа сайабылыанньа суруйбутугар, уопсай хоромньу 375 тыһыынча солкуобайтан тахса буолбута биллибит. Силиэстийэ кэмигэр полиция үлэһиттэрэ бу икки тус-туспа уорууну түргэнник арыйдылар уонна уорбут харчыларын сорҕотун тутан ыллылар.
Билигин буруйданааччыларга РФ Холуобунай кодексатын 158-с ыстатыйатынан («Уоруу») холуобунай дьыалалар тэрилиннилэр. Дьахталлар олорор сирдэриттэн барбат туһунан илии баттаатылар, диэн Саха Өрөспүүбүлүкэтин ИДьМ пресс-сулууспата суруйар.