ЫБММ Саха сиринээҕи сүрүн управлениета эрэгийиэҥҥэ ойуур баһаардара тахсар сүрүн төрүөттэрин ааттаата. Биэдэмистибэ дааннайынан, баһаар кутталлаах кэмэ саҕаланыаҕыттан уот туруу түбэлтэлэрин 60-тан тахса бырыһыана киһи буруйунан тахсыбыт. Ол курдук, уоту сэрэҕэ суох тутууттан, умуруоруллубатах табах, кутаа уоту оттууттан уонна кураанах оту уоттааһынтан.
Бэрэбиэркэ кэмигэр ойуур баһаарын таһаарбыт 8 киһи уонна айылҕа баһаарын таһаарбыт 5 киһи буруйдааҕа быһаарыллыбыт. Буруйдаахтар быһаарыллыбыт улуустара: Үөһээ Бүлүү — 3 киһи, ону таһынан Горнай, Мэҥэ Хаҥалас, Нам, Ньурба, Уус Алдан, Чурапчы уонна Орто Халыма улуустарыгар биирдии киһи.
ЫБММ буруйу оҥоруу хас да холобурун таһаарда:
- Үөһээ Бүлүү улууһа. Олохтоох киһи Өргүөт сэлиэнньэтиттэн 26,6 км сиргэ, ойуур чугаһыгар кутаа уоту оттубут. Уот ойуур пуондатын сиригэр-уотугар тарҕаммыт. РФ Административнай буруйу оҥоруу кодексатын 8.32 ыст. 4 чааһынан боротокуол оҥоһуллубут.
- Мэҥэ Хаҥалас улууһа. Олохтоох киһи Сото сэлиэнньэтин таһыгар Айыспыт диэн сиргэ умуруоруллубатах табаҕын бырахпыт. Ол түмүгэр ойуур баһаара турбут, буруйдаах киһини эппиэтинэскэ тардарга үлэ барар.
- Нам улууһа. Олохтоох киһи Столбы сэлиэнньэттэн 12,8 км сиргэ кутаа уоту умаппыт. Уот ойуурга тарҕаммыт, буруйдааҕы эппиэтинэскэ тардыы үлэтэ барар.
- Уус Алдан улууһа. Олохтоох киһи бултуу сылдьан Томтортон 7,5 км сиргэ ойуур саҕатыгар кутаа уотун оттубутун түмүгэр ойуур баһаара турбут.
- Чурапчы улууһа. Олохтоох киһи Имигитэ диэн сиргэ кураанах оту уоттаабыт. Тыалтан сылтаан уот ойуурга тарҕаммыт.
- Орто Халыма улууһа. Олохтоох киһи көҥүлэ суох кураанах оту уоттаабытын түмүгэр ойуур баһаара турбут. РФ Административнай буруйу оҥоруу кодексатын 20.4 ыст. 1 чааһынан боротокуол оҥоһуллубут.
Баһаартан сэрэхтээх буолуу ирдэбиллэрин кэһии иһин административнай сэрэтиилэр уонна хас да уон тыһыынча солкуобайга тиийэр ыстарааптар көрүллэллэр.
Ыам ыйын 26 күнүнээҕи туругунан, административнай буруйу оҥоруу туһунан 44 боротокуол оҥоһуллубут, 29 накаастабыл аныыр туһунан уураах тахсыбыт. Онтон 20-тэ – сэрэтии, оттон 9-һа — уопсайа 55 000 солкуобай суумалаах ыстараап.