Сунтаар улууһун Күндэйэтиттэн төрүттээх Сайыына Петрова Соҕуруу Кэриэйэҕэ баран, бэйэтин сөбүлүүр «BTS» бөлөҕүн кэнсиэрин көрөр саамай улахан баҕа санаата туолла.
Муус устар ыйга 26 саастаах Сайыына кэриэй биллиилээх бөлөҕүн «Swim» диэн ырыатыгар үҥкүүлээн устубут видеотун интэриниэккэ таһаарбыта. Бу видеоны «BTS» бөлөх вокалиһа Чон Чонгук бэйэтин страницатыгар тарҕаппыта уонна бөлөх салайааччыта Намджун биһирээбитин биллэрэн «лайк» туруорбута. Ол кэмҥэ кыыс баҕа санаата — кумирдарын кэнсиэригэр сылдьыы буоларын билинэн эппитэ.
Быйыл аан дойдуга аатырбыт бөлөх сыанаҕа төннөн, улахан гостуруолга туруммута. Онтон Соҕуруу Кэриэйэҕэ олорор Саха сирин блогера Айыы-Куо Сайыына баҕа санаата туоларыгар дьону барытын көмөлөһөргө ыҥырбыта. Дьон-сэргэ көмөтүнэн биир күн иһигэр 600 тыһыынча солкуобай харчы хомуллубута.
Сайыына Петрова Пусан куоракка сөбүлүүр ырыаһыттарын тыыннаахтыы көрдө. Хаартыскаҕа көстөрүнэн, кыыс кэнсиэргэ олус дьоһуннук бэлэмнэнэн барбыт — сахалыы мааны киэргэллэрин кэппит, өрөспүүбүлүкэбит былааҕын илдьэ сылдьар уонна «BTS бөлөх миигин күүстээх оҥордо» диэн ис хоһоонноох плакаты уруһуйдаан туппут.