Бэҕэһээ Ил Түмэн уочараттаах пленарнай мунньаҕар Ил Дархан Айсен Николаев СӨ Бырабыыталыстыбатын 2025 сыллааҕы үлэтин отчуоттаабыта. Айсен Николаев отчуокка экэниэмикэ, социальнай бэлиитикэ, доруобуйа харыстабыла, үөрэхтээһин, олорор дьиэни тутуу уонна байыаннай дьайыы кыттыылаахтарыгар өйөбүл дьаһалларын түмүктэрин таһаарбыта.
РФ Үлэ Дьоруойа Владимир Михайлов Ил Дархан отчуотугар бэйэтин санаатын үллэһиннэ:
— Сири кытта үлэҕэ уонна тыа хаһаайыстыбатыгар бүтүн олохпут анаабыт киһи быһыытынан, биһиги өрөспүүбүлүкэбит Ил Дарханын тыа хаһаайыстыбатын сайдыытын түмүктэрин уонна былааннарын туһунан дакылаатын хас биирдии тылын чугастык ылынабын. Өйөбүлү миэстэтигэр, улуустарга быһаарар боломуочуйалары биэрии номнуо дьиҥнээх үтүө түмүктэри аҕалара үөрдэр. Сыыппаралар кэпсииллэринэн, 109 кыра кыамталаах эбийиэк тутулунна, бааһына иэнэ кэҥээтэ, үүтү соҕотуопкалааһын уонна бурдугу хомуйуу 47% улахан историческай ситиһиилэннэ. Биһиги, тыа сирин үлэһит дьоно, бу өйөбүлү көрөбүт. Саҥа хотоннор, сайылыктар тутуллаллар, бааза бөҕөргүүр, бу барыта сарсыҥҥы күҥҥэ эрэли үөскэтэр. Ону кытта Ил Дархан сүрүн боппуруоска толору сөпкө уонна чиэһинэйдик этэр: олорон биэрэр табыллыбат. Оҥорон таһаарыы кээмэйэ түһүүтэ уонна, маныаха ордук миэхэ, сүөһү иитиитинэн дьарыктанар киһи, ыарыылаахтык ылынабын, сүөһү ахсаана аччааһына билигин даҕаны тохтуу илик. Бу биһиги сүрүн тургутуубут. Хотугу сиргэ сүөһү – нэһилиэк олоҕун төрдө, дойду аһынан-үөлүнэн куттала суох буолуутун акылаата. Ити кыһалҕаны быһаарарга нэһилиэктэр инфраструктураларын сайыннарыахха наада, оччоҕо эдэр дьон сиргэ хаалан, аныгы усулуобуйаҕа үлэлээн, инникини тутуохтар этэ.