Самаан сайын салаллан кэлэн, дьон оҕуруоттарын, сибэккилэрин олордон, күнү быһа түбүгүрэ сылдьаллар.
Сииттэ оҕуруотчут хаһаайкалара моркуоп, сүбүөкүлэ, помидор, оҕурсуу араас суортарын олордоллорун таһынан, арбуз, тыква, биэрэс, патиссон, кабачок араас суортарын олордууну улаханнык баһылаан эрэллэр. Элбэх оҕону иитэ ылбыт дьиэ кэргэн ийэтэ Марианна Захарова кэргэнинээн Иван Захаровтыын клубника үс арааһын үүннэрбиттэрэ хаһыс да сыла. Быйыл эмиэ 150 устуука клубниканы, 50 дьэдьэни олордон, кырачааннарын минньигэс дьэдьэнинэн күндүлүүргэ бэлэмнэр. Уопуттаах оҕуруотчуттартан эдэр хаһаайкалар сүбэ-ама ылаллар.
Биһиги нэһилиэк хаһыс да сылбытын тэрилтэлэри, искибиэрдэри сибэккинэн симиибит. Аҕыйах ыйынан сибэккинэн симэммит нэһилиэкпит киэркэйиэ, киһи хараҕын үөрдүө-көтүтүө.
Кэнники сылларга элбэх ыал мас арааһын олордор буолбутун кэтээн көрөбүт. Ол курдук Мотрена Колмогорова сирень, яблоня мастара силигилээн сибэккилии туралларын, анал группаҕа хаартыскаҕа түһэрэн ыытарын элбэх киһи сэҥээрэр. Кырдьаҕас оҕуруотчут Вера Павлова черемухата (хапырыас, харас), акацията, бузиналара тиэргэнин иһигэр силигилии үүммүттэрин астына, сөҕө көрөбүт. Ити курдук суруйан истэх аайы киһи сэргиирэ, сэнээрэрэ элбэх. Аны күһүн оҕуруоттарын аһа силигилии үүммүтүн билиһиннэриэхпит, сонуннарга сэгэтиэхпит.
Марианна Сивцева.