Тымныы полюһа Өймөкөөн улууһун Төрүт нэһилиэгин олохтоохторо бу күннэргэ быйыл урукку ыһыахтыыр сирдэрин нэһилиэктэн чугас турар киэҥ сиргэ көһөрдүлэр.
Бу үлэҕэ эдэрдиин-эмэнниин бары саба түһэн субуотунньуктуулларын туһунан улуус мунньаҕын сэбиэтин дьокутаата, олохтоох уһуйаан сэбиэдиссэйэ Уруйдаана Атласова бу курдук сырдатта:
— Быйыл Култуура уонна Норуоттар сомоҕолоһууларын сылларыгар анаммыт улуустааҕы ыһыах биһиги нэһилиэкпитигэр ыытыллар. Бу суолталаах тэрээһин биир дойдулаахпыт, саха лирик-бэйиэтэ Пантелеймон Тулааһынап 110 сылыгар уонна Култуура дьиэтэ тутуллан үлэҕэ киирбитэ 70 сылыгар ананар. Урукку ыһыахтыыр сирбит кыараҕас уонна уу ылар буолан, быйыл тэрээһиннэрбитин ыытар түһүлгэбитин нэһилиэкпит биир киэҥ-куоҥ кураанах хонуутугар көһөрдүбүт.
Субуотунньуктары Чэмэлиинэ Атласова салайар дьахтар сэбиэтэ уонна олохтоох уһуйаан кэлэктиибэ көҕүлээн ыытабыт.
Бу күннэргэ эмиэ субуотунньугунан Бэтэрээннэр уонна байыаннай дьайыыга олохторун толук уурбут уолаттарбыт искибиэрдэрин аллеятыгар көҕөрдүү ыыттыбыт, тулатын тупсарыыга үлэлээтибит.
… Бүгүн Дьокуускайтан Төрүккэ улуустааҕы ыһыахха “Мин ырыам олоҕу хоһуйар” айар куонкуруска кытта эдэр бэйиэттэр бөлөхтөрө айаннаата. Таатта улууһун Дьохсоҕонуттан Пантелеймон Тулааһынап искибиэрин оҥорууну көҕүлээбит рационализатор, үлэ бэтэрээнэ, уопсастыбанньык Ион Попов уонна үлэ, успуорт бэтэрээнэ Лев Попов ыалдьыттыы тиийиэхтэрэ. «Ыһыах бырагыраамата наһаа үчүгэй эбит. Бокуойдааҕым буоллар, барсыа эбиппин. Бэркэ ымсыыра хааллым. «Эдэр саас бэйиэтэ» диэн биир чаҕылхай түһүмэҕи олус да бэркэ ааттаабыттар, — диэн Өксөкүлээх Өлөксөй аатынан Дьохсоҕон орто оскуолатын эбии үөрэхтээһиҥҥэ педагога, РФ үөрэҕириитин бочуоттаах үлэһитэ Татьяна Попова санаатын тиэртэ. Маны таһынан, Төрүт ыһыаҕар улуус кииниттэн араас омук бэрэстэбиитэллэрэ, аатырбыт «Золотинка» үҥкүү ансаамбыла, Томтор, Өймөкөөн нэһилиэктэриттэн күүтүүлээх ыалдьыттар хото тиийиэхтэрэ.
Онон Төрүт нэһилиэгэр бу күннэргэ ыһыахха бэлэмнэнии үлэтэ күөстүү оргуйар.