Уус-Алдан улууһун полиция отделын дьуһуурунай чааһыгар олохтоох биэнсийэлээх дьахтар даачатыттан ас-үөл уорбуттарын туһунан үҥсүү киллэрбит. Уопсай хоромньу 15 тыһыынча солкуобайга сыаналаммыт.
Суһал-көрдүүр үлэлэр түмүктэригэр, уорбаланааччыны холуобунай көрдөөһүн үлэһиттэрэ суоллаан булбуттар. Кини урут уорууга уорбалана сылдьыбыт 55 саастаах олохтоох киһи буолара быһаарыллыбыт.
Полицейскайдар быһаарбыттарынан, уорбаланааччы дьиэлээх хотун суоҕунан туһанан, куорат таһынааҕы даача дьиэтигэр киирбит уонна аһы-үөлү уорбут. Тоҥоруллубут 3 киилэ ынах этин, икки баалка ыыһаммыт халбаһыыны, ынах этиттэн фаршы уонна сымыыты уорбут. Ону таһынан, тиэргэҥҥэ турар баанньыктан 40 лиитирэлээх бөтүөнү уонна 20 миэтэрэ уһуннаах алтан боруобаты ылбыт. Уорбут малларыттан сороҕун уорбаланааччыттан былдьаан дьиэлээх хотунугар төнүннэрбиттэр.
Бу түбэлтэнэн РФ Холуобунай кодексатын 158-с ыстатыйатын 3-с чааһынан («Уоруу») холуобунай дьыала тэриллибит. Бу ыстатыйаҕа олоҕуран, буруйдаах киһи 6 сылга диэри көҥүлэ быһыллыан сөп.