Саха Өрөспүүбүлүкэтин Мэҥэ Хаҥалас оройуонун суута 41 саастаах олохтооҕу Арассыыйа Холуобунай кодексатын 264 ыстатыйатын 3 чааһынан буруйдааҕынан билиннэ. Бу туһунан СӨ Сууттарын холбоһуктаах пресс-сулууспата иһитиннэрэр.
Суукка быһаарыллыбытынан, 2026 сыл тохсунньу 5 күнүгэр сарсыарда «Toyota Gaia» массыына суоппара, Дьокуускайтан Чурапчы улууһун Дириҥ сэлиэнньэтин диэки айаннаан иһэн, суол быраабылатын кэспит. Массыына иһигэр пассажирдар олорсон испиттэр. Суоппар иннин-кэннин көрбөккө, утары иһэр суолга тахсан, «Toyota Wish» массыынаны кытта харсыспыт. «Toyota Wish» Чурапчы улууһуттан Мэҥэ Хаҥалас улууһун диэки баран испит. Суол быһылаанын түмүгэр, «Toyota Gaia» пассажира ылбыт эчэйиилэриттэн Чурапчытааҕы киин балыыһаҕа киирэн өлбүт, оттон «Toyota Wish» суоппара ыарахан эчэйиини ылбыт.
Суукка буруйданааччы буруйун толору билиммит уонна дьыаланы ураты бэрээдэгинэн көрөргө хадатаайыстыбаны өйөөбүт. Кини этэринэн, буруйдааһын уонна хадатаайыстыба көмүскээччини кытта сүбэлэһэн баран, баҕа өттүнэн бэриллибитэ өйдөнөр диэбит. Адвокат көмүскээччитин позициятын өйөөбүт.
Эмсэҕэлээбит өрүт ураты бэрээдэги утарбатах. Ол эрээри, буруйданааччы өлбүт кыыс көмүүтүгэр 300 тыһыынча солкуобайы ыыппытын, оттон бырастыы гыннарыытын силиэстийэ бүтүүтүгэр эрэ эппитин бэлиэтээбиттэр.
Суут буруйданааччы тус олоҕун, ону тэҥэ оҥоһуллубут дьыала уопсастыбаҕа дьайыытын уонна таһымын үөрэтэн баран, киниэхэ 2 сылга көс-холуонньаҕа көҥүлүн быһарга уураахтаата. Ону таһынан, эр киһи 2 сылга тырааныспары салайар бырааба быһылынна.
Ону тэҥэ, Арассыыйа Холуобунай кодексатын 82 ыстатыйатын 1 чааһыгар олоҕуран, суут кинини кыра оҕото 14 сааһын туолуор диэри – 2027 сыл алтынньы 2 күнүгэр диэри көҥүлүн быһыыны болдьоҕун көһөрөргө, уһатан биэрэргэ уураахтаата, тоҕо диэтэххэ кини оҕотун соҕотох төрөппүтэ буолар. Эбии накаастабыл көҥүлү быһар накаастабылы толоруу кэнниттэн толоруллуохтаах.
Суут уурааҕа сокуоннай күүһүгэр киирэ илик.