Бүгүн Саха Өрөспүүбүлүкэтин Ис дьыалаҕа министиэристибэтигэр анал байыаннай дьайыыга хорсуннук охтубут полиция ыстаарсай прапорщига Сергей Гудкову кэриэстиир тэрээһин буолла.
Өйдөбүнньүк дуосканы министиэристибэ Наркотик эргиирин хонтуруоллуур управлениетын дьиэтин эркинигэр арыйдылар. Тэрээһиҥҥэ чугас дьонноро: ийэлээх аҕата Марина Михайловна уонна Владимир Иванович, огдообо кэргэнэ Юлия Викторовна, убайа Евгений Владимирович уонна аймахтара, ИДьМ миниистирин солбуйааччы Юрий Выродов, УНК начаалынньыга, полиция полковнига Владимир Черкашин, управление тус састаабын уонна Росгвардия «Алмаз» СОБР-ын байыастара кытыннылар.
Полиция ыстаарсай прапорщига Сергей Гудков өрөспүүбүлүкэ иһинээҕи Ис дьыала уорганнарыгар 2007 сылтан 2024 сылга диэри сулууспалаабыта. Ол кэм улахан аҥаарын «Гром» уонна «Алмаз» анал сыаллаах этэрээттэргэ атаарбыта. Терроризмы утары хас да эппэрээссийэҕэ кыттыбыта. Сулууспалыы сылдьан байыаннай дьайыылар бэтэрээннэрин статуһун ылбыта.
Ис Дьыала миниистирин солбуйааччы Юрий Выродов миниистир Владимир Прокопенко уонна министиэристибэ бары үлэһиттэрин ааттарыттан Гудковтар дьиэ кэргэттэригэр уонна чугас дьонноругар дириҥ кутурҕанын биллэрдэ:
«Мин Сергейи тус бэйэм билэрим. Кини эр киһи чиэһин холобура, чаҕылхай, олус сэмэй киһи этэ. Маннык эр дьон ийэ тапталлаах, аҕа көрүүлээх-истиилээх дьиэ кэргэҥҥэ эрэ иитиллэн тахсаллар. Уолгут иһин эһиэхэ дириҥник сүгүрүйэбин. Биһиги эһигини кытта тэҥҥэ курутуйабыт. Аҕалыы баҕа санаам диэн — маннык кутурҕаннаах тэрээһиннэр манан түмүктэнниннэр. Биһиги уустук кэмҥэ олоробут — Сергей курдук эр дьон бары ыҥырыылары уонна кутталлары бэйэлэригэр ылынар кэмнэригэр. Былыр-былыргыттан Арассыыйа Төрөөбүт дойдуларын туһугар саалаах охтубут бухатыырдарынан аатырар. Охтубут доҕотторбутун барыларын өйдүү-саныы сылдьыахтаахпыт. Биһиги өйдүүрбүт тухары — кинилэр тыыннаахтар, кинилэр биһиги кэккэбитигэр аттыбытыгар бааллар», — диэн бэлиэтээтэ кини.
Тэрээһин түмүгэр байыас төрөппүттэрэ Саха сирин ИДьМ бэрэстэбиитэллэригэр өйөбүллэрин, болҕомтолорун уонна, саамай сүрүнэ, Сережаларын умнубаттарын иһин дириҥ махталларын тиэртилэр.