Бүгүн, атырдьах ыйын 21 күнүгэр, «Россия 24» телеханаалга Ил Дархан Айсен Николаев ыйытыыларга хоруйдаата.
Ил Дархан Айсен Николаев өрөспүүбүлүкэ киин куоратын маастар-былаанын олоххо киллэрии хаамыытын уонна 2032 сылга Дьокуускай куорат бэлэмнэниитин туһунан кэпсээтэ. Кини этэринэн, улахан бырайыактар хайыы-үйэ Дьокуускай көстүүтүн уларыппыттар.
Өрөспүүбүлүкэ киин куоратыгар киин болуоссаты, Сайсары күөлүн тупсарыыга бырайыактар түмүктэммиттэр. Өссө 20-чэ эбийиэк олоххо киирэрэ былааннанар. Олортон, биллэрин курдук, биир саамай улаханнара — Өлүөнэни туоруур муоста. Ил Дархан муостаны тутуу үлэтэ көхтөөхтүк салҕанарын бэлиэтээн эттэ.
2032 сылга Дьокуускай куорат тэриллибитэ 400 сылын бэлиэтиэҕэ. Бу бэлиэ даатаны көрсө куоракка туох үлэ ыытылларын, история уонна аныгы үйэ сибээһэ хайдах көстүөҕүн туһунан ыйытыыга Ил Дархан маннык хоруйдаата:
—2032 сылга Дьокуускай куорат 400 сылын бэлиэтиэхпит. Улахан даата — улахан эппиэтинэс. Маныаха историяҕа киирбит кэккэ эбийиэктэри чөлүгэр түһэрэр былааннаахпыт. Интэриэс улахан. Ол курдук, «Кырдьаҕас куорат-2» бырайыагы ааттыыбыт. Бу улахан историяны көрдөр, дьон-сэргэ сынньанар сирэ-уота буолуоҕа. Туристар болҕомтолорун тардыаҕа. Билигин дьоннор уруккуну сэргииллэрэ, сэҥээрэллэрэ улаатан иһэр.