Муусука үрдүкү оскуолатыгар уонна Арктикатааҕы эпос, ускуустуба киинин эбийиэктэригэр тутуу сүрүн үлэлэрэ бу сыл түмүктэниэр диэри бүтүөҕэ. Ити туһунан Ил Дархан Айсен Николаев “Россия 24” ханаалга быһа эпиир кэмигэр иһитиннэрдэ.
Ил Дархан Айсен Николаев “Россия 24” ханаалга интервью биэрдэ. Быһа эпииргэ өрөспүүбүлүкэ сайдыытын, аан дойдутааҕы аренаҕа кини суолтатын уонна эрэгийиэҥҥэ олох хаачыстыбата тупсуутун, ол иһигэр Муусука үрдүкү оскуолатын, Эпос уонна ускуустуба Арктикатааҕы киинин тутуу сүрүн боппуруостара дьүүллэһилиннэр.
10 тыһ. кв.м. иэннээх Муусука үрдүкү оскуолатын кампуһа дойду Бэрэсидьиэнэ Владимир Путин быһаччы сорудаҕынан тутуллар. 1993 сыллаахха өрөспүүбүлүкэ Бастакы Бэрэсидьиэнэ Михаил Николаев тэрийбит үөрэҕин кыһатыгар алын, орто уонна үрдүк үөрэхтэр бары киирэллэр.
“Кампус тутулуннаҕына, биллэн турар, онно талааннаах оҕолору бэлэмнииргэ ураты усулуобуйа олохтонуоҕа. Бырайыагынан 240 миэстэлээх кэнсиэртиир саала, муусука ускуустубатын араас көрүҥнэринэн дьарыктанарга анал саалалар, успуорт саалата уонна аудиториялар көрүллэллэр” – диэн Ил Дархан бэлиэтээтэ.
Иккис баараҕай эбийиэгинэн 33 тыһ. кв. м. иэннээх уонна 1,5 тыһ. кэриҥэ миэстэлээх Эпос уонна ускуустуба арктикатааҕы киинэ буолуоҕа. Бырайыак Уһук Илиҥҥэ да, Арассыыйа арктическай өртүгэр даҕаны култуура бөдөҥ киининэн биллэр. Бу эбийиэккэ Саха сиринээҕи судаарыстыбаннай филармония уонна Олоҥхо тыйаатырын туспа саалалара олохтонуохтара. Айсен Николаев саҥа эбийиэктэр аан дойду ыстандаартынан таҥыллыбыт үөрэх-култуура биир кэлим кластерын оҥоруохтара диэн бэлиэтээтэ.
“Бу курдук түмүү оҕолорбут Муусука үрдүкү оскуолатыгар үөрэнэллэригэр, бэлэмнэллэригэр, онтн бу улахан кииҥҥэ үлэлэрин салгыылларыгар кыаҕы биэриэҕэ” – диэн өрөспүүбүлүкэ салалтата түмүктээтэ. Бу туһунан Улус.Медиа суруйар.