Дьокуускай куоракка уопсастыбаннай тырааныспар тохтоло суох үлэтин хааччыйар туһуттан оптуобустары сапыраапкалааһын кэлим былаана оҥоһулунна.
«Сахатранснефтегаз» АУо уонна «СахаАвто» тэрилтэ икки ардыларыгар сөбүлэһии быһыытынан, куорат оптуобустара уочарата суох сапыраапкаланаллар. Ол курдук, Можайскай уулуссаҕа баар ыстаансыйаҕа сарсыарда 5:30-тан 8:00 ч. диэри, оттон 8:00 чаас кэннэ — Жатайдааҕы АГЗС-ка. Маннык бэрээдэк тырааныспар маршруттарга бириэмэтигэр тахсарын уонна дьон-сэргэ табыгастаахтык сылдьарын мэктиэлиир. Бу туһунан СӨ бырамыысыланнаска уонна геологияҕа миниистирин солбуйааччы Михаил Копырин брифинг кэмигэр иһитиннэрдэ.
Уопсайынан, өрөспүүбүлүкэ үрдүнэн нэһилиэнньэни уонна тэрилтэлэри кыһын иннинэ убатыллыбыт айылҕа гааһынан (СУГ) хааччыйыыга систиэмэлээх үлэ ыытыллар. «Сахатранснефтегаз» АУо күн ахсын ортотунан 30 туонна пропан-бутан булкадаһыгын атыылыыр. Бу кээмэй оттук сезонун саҕаланыытыгар уматык эрэллээх саппааһын тэрийэр стратегическай соругу учуоттаан быһаарыллыбыт.
«Атыылааһын кээмэйин сүрүннээһин оттук сезонун саҕаланыар диэри гаас толору саппааһын хаалларар соруктаах. Оттук сезона саҕаланнаҕына, убатыллыбыт айылҕа гааһын оҥорон таһаарыы улаатыаҕа, оччоҕуна билигин туттуллар нуормалары сыыйа устуохпут», — диэн СӨ бырамыысыланнаска уонна геологияҕа миниистирин солбуйааччы Михаил Копырин эттэ.
Билигин Дьокуускайга «Сахатранснефтегаз» түөрт сүрүн гаас сапыраапкалыыр ыстаансыйата (АГЗС) туруктаахтык үлэлиир.
Иккис бөдөҥ хааччыйааччынан ЯТЭК хампаанньа буолар, кини Дьокуускайга уонна чугастааҕы нэһилиэнньэлээх пууннарга ортотунан күҥҥэ 40–50 туонна гааһы тиэрдэр. ЯТЭК эбийиэктэригэр былааннаах регламентнай үлэлэр түмүктэннилэр, онон уматыгы тиэйии толору кээмэйинэн ыытыллар.