Саха сирин түөрт Арктика улууһугар оттук кэмэ номнуо саҕаланна. Ол курдук, Аллаайыаха улууһугар ититиини атырдьах ыйын 8 күнүттэн биэрбиттэрэ, Анаабырга — атырдьах ыйын 15 күнүттэн, Аллараа Халымаҕа — 18 күнүттэн, оттон Өлөөҥҥө — атырдьах ыйын 20 күнүттэн саҕаламмыт.
Өрөспүүбүлүкэ атын улуустарын 2026-2027 сыллардааҕы оттук сезонугар бэлэмнээһин бигэргэтиллибит кыраапыкка сөп түбэһиннэрэн салҕанар. Өрөбүллэргэ СӨ Олох-дьаһах хаһаайыстыбатын уонна энергетикатын миниистирэ Вячеслав Емельянов Өлүөхүмэ улууһугар үлэтинэн сылдьан, оттук сезонугар бэлэмнэниигэ анаммыт бырабыыталыстыба хамыыһыйатын мунньаҕын ыытта. Мунньахха Алдан, Нүөрүҥгүрү, Өлүөхүмэ, Сунтаар, Ньурба, Үөһээ Бүлүү уонна Бүлүү улуустарын бэрэстэбиитэллэрэ кытыннылар. Мустубут дьон хомунаалынай инфраструктура эбийиэктэрин Ростехнадзор ирдэбиллэригэр сөп түбэһиилэрин, бэлэмнэрин ырыттылар. Уматыгы тиэйиигэ туспа болҕомто уурулунна.
«Мунньах түмүгүнэн көрдөххө, бу улуустарга балаһыанньа бигэ. Билиҥҥи боппуруостар үлэ бэрээдэгинэн быһаарыллаллар уонна былааннаммыт болдьохтон тахсыбаттар. Баар итэҕэстэр тус биирдиилээн хабааннаахтар, тус болдьоҕор туоратыллаллар. Хас биирдии эбийиэги хонтуруолга тутабыт. Сэтинньи 15 күнүгэр диэри бэлэм буолуу пааспардарын ылыы соруга барыларыгар хайаан да туолуохтаах ирдэбил буолар», — диэн бэлиэтээтэ Вячеслав Емельянов.
Командировка кэмигэр миниистир Өлүөхүмэ куоратын уонна нэһилиэктэрин хас даҕаны хочуолунайдарыгар сырытта. Манна айылҕа гааһыгар көһөрүүгэ бэлэмнэнии үлэлэрэ бараллаллар. Кини саҥардыыны эрэйэр эбийиэктэри көрдө, ону таһынан урукку сылларга оттук сезонугар бэлэмнэниигэ итэҕэстэр тахсыбыт хочуолунайдарын бэрэбиэркэлээтэ. Маны таһынан, гааска көһөрүү үлэтэ саҕаламмыт эбийиэктэрин туругун бэрэбиэркэлээтэ.
«Бэрэбиэркэ түмүгүнэн, бырайыактыыр докумуоннары уонна үп-харчы моделларын оҥорууну түргэтэтэргэ, бары түһүмэхтэри гаастааһын кыраапыгын кытта дьүөрэлииргэ сорудахтаатым. Улуустарга субсидиялары кэмигэр тиэрдиигэ уонна эбийиэктэр кыһыҥҥы кэмҥэ бэлэм буолууларыгар туспа болҕомтону уурдум. Гааска көһүү улуус үрдүнэн сылааһынан хааччыйыы эрэллээх буолуутун үрдэтэрин таһынан, хочуолунайдар үлэлэрин тупсарыы суотугар бүддьүөт үбүн биллэрдик кэмчилиир кыаҕы биэриэ», — диэн миниистир эттэ.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.