Саха сиригэр «АрктикТелеком» АУо олоххо киллэрэр «Арктика синергията» бырайыагын чэрчитинэн телекоммуникация инфраструктуратын сайыннарыыны уонна «Росатом» эбийиэктэрин оптоволокнолаах сибээс лииньийэлэригэр холбуур кыахтары дьүүллэстилэр.
Үлэ көрсүһүүтүгэр Саха сирин Инновацияҕа, сыыппара сайдыытыгар уонна инфокоммуникационнай технологияларга миниистирэ Петр Николаев, «Росатом» АО Саха сиринээҕи филиалын дириэктэрэ Алексей Лаптев, «Росэнергоатом Концерн» АО «Саха сиринээҕи АСММ» филиалын дириэктэрэ, ону тэҥэ «Арктика синергията» бырайыак дирекциятын бэрэстэбиитэллэрэ кытыннылар. «Арктика синергията» бырайыагы «АрктикТелеком» хампаанньа салайан ыытар. Бырайыак көмөтүнэн Саха сирин Арктика улуустарыгар аныгы оптоволокнолаах сибээс инфраструктуратын тутуу үлэтэ эрчимнээхтик барар.
Көрсүһүү сүрүн тиэмэлэриттэн биирдэринэн «Хаандыга — Уус Куйга» хайысхатынан ВОЛС тутуута буолла. 2027 сылга Уус Куйга бөһүөлэгин, оттон 2028 сылга Депутатскай бөһүөлэгин түргэн интэриниэтинэн хааччыйар былааннаахтар. Инникитин инфраструктураны сайыннарыы сибээс лииньийэтин Тиксии диэки салгыы тардыыны уонна онно баар эбийиэктэри холбооһуну көрөр.
«Улахан бырамыысыланнай тэрилтэлэргэ эрэллээх сибээс билигин уот-күүс эбэтэр тырааныспар курдук олус наадалаах. «Арктика синергията» бырайыак хас даҕаны соругу быһаарар инфраструктура каркаһын оҥорорго көмөлөһүөҕэ: дьону-сэргэни аныгы интэриниэтинэн хааччыйыаҕа уонна улахан хампаанньалар технологичнай эбийиэктэрин холбуур кыаҕы биэриэҕэ. Бу өттүнэн «Росатомы» кытта бииргэ үлэлээһин ураты суолталаах», — диэн бэлиэтээтэ миниистир Петр Николаев.
«Арктика синергията» бырайыак дириэктэрэ Виктор Сергеев бэлиэтээбитинэн, улахан эбийиэктэри сибээскэ холбооһун – оҥоһуллар инфраструктураны туһаныы биир сүрүн хайысхата буолар. «Биһиги ВОЛС-у уһун кэмнээх кэскили уонна территория ирдэбилин учуоттаан тутабыт. Бу нэһилиэнньэлээх пууннарга анаммыт көннөрү интэриниэт эрэ буолбатах — бу пбырамыысыланнай тэрилтэлэр, социальнай эбийиэктэр уонна атын да тэрилтэлэр холбонор кыахтаах инфраструктуралара. «Росатом» эбийиэктэрин Уус Куйгаҕа холбооһун — бу бырайыак биир кэмҥэ биисинэс сайдыытыгар уонна дьон олоҕун хаачыстыбатын тупсарыыга үлэлиэн сөбүн туоһулуур чаҕылхай холобур буолуоҕа», — диэтэ Виктор Сергеев.
Ону тэҥэ кэпсэтии кэмигэр «Росатом» эбийиэктэрин ВОЛС-ка холбуур уонна бырамыысыланнай эбийиэктэр эрэллээх буолууга үрдүк ирдэбиллэрин учуоттаан, сибээс ханаалларын резервэлиир кыахтары дьүүллэстилэр. «Онон, «Арктика синергията» бырайыак биир кэмҥэ икки соругу быһаарар кыахтаах: ыраах, тиийэргэ уустук улуустар олохтоохторугар интэриниэт хаачыстыбатын уонна түргэнин үрдэтэр, ону тэҥэ улахан эбийиэктэргэ, ол иһигэр «Росатомҥа», аныгы телекоммуникационнай инфраструктураны тэрийэр», — диэн түмүктээтэ Петр Николаев.