Дьокуускай куоракка уматык тула үөскээбит балаһыанньаны туһанан харчы оҥосто сатаабыт 27 саастаах эр киһини полиция үлэһиттэрэ туттулар. Кини бэнсиини үрдэтиллибит сыанаҕа атыылыы сылдьыбыт. Бу туһунан Саха сиринээҕи ИДьМ пресс-сулууспата иһитиннэрэр.
Силиэстийэ быһаарбытынан, эр киһи куорат биир сапыраапкатыттан бэнсиин куттан баран, мессенджердэр чааттарыгар АИ-95 уматыгы лиитирэтин 266 солкуобайга атыылыырын туһунан биллэриилэри тарҕаппыт. Дьокуускайдааҕы 4-с нүөмэрдээх полиция отделын участковайдара сокуону кэһээччини 202-с түөлбэ биир тиэргэнигэр бэнсиини атыылыы турдаҕына туппуттар. Кини массыынатын багажнигыттан уопсайа 30 лиитирэлээх икки канистра бэнсиин былдьаммыт. Билигин бу киһиэхэ РФ Административнай буруйу оҥоруу кодексатын 14.1 ыстатыйатынан дьыала тэрилиннэ.
Полиция сэрэтэр: бэнсиини уонна дизельнэй уматыгы анал регистрацията уонна лиссиэнсийэтэ суох атыылааһын, эргинии сокуону кэһиинэн ааҕыллар. Маннык дьайыы иһин административнай, оттон сорох түгэҥҥэ холуобунай да эппиэтинэс көрүллэр.