Өрөспүүбүлүкэтээҕи реабилитация уонна спортивнай мэдиссиинэ киинигэр улахан дьону чөлүгэр түһэрэр салаатыгар ураты тэрил — AlterG антигравитационнай сүүрэр суол үлэҕэ киирдэ.
Бу тэрээһин Арассыыйа бэрэсидьиэнэ Владимир Путин көҕүлээбит «Уһун уонна көхтөөх олох» нацбырайыагын, ону таһынан Саха сирин Ил Дархана Айсен Николаев дьон доруобуйатын бөҕөргөтүүгэ уонна доруобуйа харыстабылын сайыннарыыга стратегическай ыйааҕын олоххо киллэрии чэрчитинэн ыытылынна. Мэдиссиинэ киинин исписэлиистэрэ бэлиэтииллэринэн, үрдүк технологиялаах аппараат салгын баттааһынын көмөтүнэн киһи бэйэтин ыйааһынын 80 %-ҥа диэри чэпчэтэр кыахтаах. Ол аата, киһи аппараат иһигэр киирэн хаамарыгар эбэтэр сүүрэригэр космоска сылдьарын курдук чэпчэкитик сананнаҕына, сүһүөхтэригэр ноҕуруускаламмат.
Бу араас эчэйии ылбыт, тобуктарыгар, сүһүөхтэригэр уонна тоноҕос ууҥуохтарыгар эпэрээссийэни ааспыт ыарыһахтар түргэнник үтүөрэллэригэр улахан көмөлөөх. Оттон спортсменнарга доруобуйаларыгар буортута суох эрчиллиилэрин кээмэйин улаатыннарарга олус туһалаах. «БЕКА-РУС» ХЭТ килииньикэҕэ исписэлиис-реабилитолог Александр Барабанов саҥа тренажер кыахтарын сиһилии көрдөрдө уонна киин үлэһиттэрин ыйытыыларыгар хоруйдаата.
Исписэлиис этэринэн, AlterG сүрүн уратыта — ыарыыны намтатыы, реабилитацияны эрдэ саҕалааһын уонна куттала суох буолуута. Ол курдук, манна хаамар эбэтэр сүүрэр олус сымнаҕас уонна табыгастаах, кытаанах да эчэйиилэр кэнниттэн ыарыыта суох ааһар.
AlterG антигравитационнай сүүрэр суолун туһаныы — Киин реабилитациялыыр сулууспатын сайдыытыгар улахан хардыынан буолар. Саҥа тэрил эчэйии уонна эпэрээссийэ кэнниттэн түргэнник уонна куттала суох көхтөөх олохторугар төннөллөрүгэр, оттон спортсменнарга — бэйэлэрин формаларын сүтэрбэккэ, эти-хааны аһара сылаппакка чөлүгэр түһэрэллэригэр күүс-көмө буолуоҕа.