Пекин куоракка аан дойдутааҕы интенсивка Дьокуускай куорат оскуолатын оҕолоро уонна устудьуоннара кытыннылар.
Цинхуа университетын уонна Bytedance хампаанньа өйөбүлүнэн тэриллибит IV-с аан дойдутааҕы программированиеҕа үөрэтэр лааҕыр атырдьах ыйын 18-22 күннэригэр ыытылынна. Бу ICPC финалыгар кыттар күүстээх хамаандалар аан дойду бары муннугуттан түмүстүлэр.
Барыта 34 хамаанда Кытайтан, Сингапуртан, Канадаттан, Соҕуруу Кореяттан, Японияттан уонна атын дойдулартан кытыннылар. Олортон Арассыыйаттан соҕотох дэлэгээссийэ — Дьокуускай куорат хамаандата буолар.
Биһиги өрөспүүбүлүкэбит аатыттан икки хамаанда кытынна, кинилэр күүскэ бэлэмнэммиттэр, бүтүн Арассыыйатааҕы уонна аан дойдутааҕы күрэхтэргэ кыайыылары ситиспиттэр, баай уопуттаахтар уонна дьулуурдаахтар.
«Айс» устудьуоннар хамаандата — Тимур Куличкин, Святослав Каратаев уонна Марк Лыткин, ХИФУ ИМИ үөрэнээччилэрэ буолаллар. Оскуола оҕолорун хамаандата — Бэрдьигэстээх гимназиятын үөрэнээччитэ Александр Антонов уонна Арктика оскуолатын үөрэнээччитэ Дамир Шишигин. Дэлэгээссийэ салайааччытынан – ХИФУ ИМИ преподавателэ Дьулустаан Никифоров сырытта.
Маннык интенсивка кыттыы олус туһалаах уопут. Ыарахан сорудахтар, аан дойду күүстээх хамаандаларын кытары кэпсэтии, саҥа билии уонна билсии. Сэтинньи ыйга ыытыллар ICPC 50-с аан дойдутааҕы чөмпүйэнээтигэр бэлэмнэнии. Дьокуускай оскуола оҕолоро уонна устудьуоннар аан дойду таһымыгар үрдүк таһымнаахтык кытталлара үөрүүлээх. Бу өрөспүүбүлүкэ ситимнээх үлэтин түмүгэ: талааннаах оҕолору өйөөһүн, IT-үөрэҕи сайыннарыы, эрдэтинэ идэҕэ үөрэтии.