Дьокуускай куоракка оттук кэмэ саҕаланар күннэрэ бигэргэннэ. Атырдьах ыйын 24 күнүгэр куорат баһылыга Дмитрий Садовников ититиини холбуур туһунан дьаһалга илии баттаата.
Докумуоҥҥа сурулларынан, бастатан туран, үөрэх, доруобуйа харыстабылын уонна социальнай хайысхалаах тэрилтэлэргэ сылааһы балаҕан ыйын 1 күнүгэр диэри холбуохтара. Оттон дьон олорор дьиэлэригэр — балаҕан ыйын 5 күнүгэр диэри биэриэхтэрэ.
«Өскөтүн таһырдьа салгын сууккатааҕы орто температурата салгыы биэс хонук устата +8°C кыраадыстан намыһах буоллаҕына, сылааһы кэтэспэккэ тутатына холбуурга дьаһал ылыллыаҕа», — диэн дьаһалга чуолкайданар.