Мэҥэ Хаҥалас улууһугар Е. Д. Кычкин аатынан Матта орто оскуолата хапытаалынай өрөмүөн кэнниттэн саҥа үөрэх дьылыгар бэлэм буолла.
Өрөмүөн Арассыыйа Бэрэсидьиэнэ Владимир Путин көҕүлээбит «Ыччат уонна оҕолор» национальнай бырайыак чэрчитинэн ыытылынна. Итиэннэ «Биир ньыгыл Арассыыйа» баартыйа норуот бырагырааматын «Саҥа оскуола» федеральнай бырайыагын сыалларыгар сөп түбэһэр. Оскуоланы саҥардыыга 47 мөлүйүөн солкуобай көрүлүннэ. Балаҕан ыйын 1 күнүгэр оскуола үөрэнээччилэри уонна учууталлары саҥардыллыбыт усулуобуйаҕа көрсүөҕэ.
Матта оскуолатын дьиэтэ 1995 сыллаахха тутуллубута. Манна өрөмүөн үлэтэ 2007 сылга ыытыллыбыта. Билиҥҥи саҥардыы үлэтэ — бу үөрэх тэрилтэтин устуоруйатыгар бастакы хапытаалынай өрөмүөн буолар.
Бары былааннаммыт үлэлэр кээмэйинэн толорулуннулар уонна болдьоҕун иннинэ түмүктэннилэр.
— Биһиги оскуолабытыгар бу улахан суолталаах түгэн. Биһиги өрөмүөн бүтэрин олус күүппүппүт уонна балаҕан ыйын 1 күнүгэр саҥардыллыбыт оскуолаҕа үлэлиирбититтэн үөрэбит. Билигин манна сырдык, табыгастаах уонна, саамай сүрүнэ, куттала суох буолла. Саҥардыллыбыт кэбиниэттэр, миэбэл, тиэхиньикэ, өрөмүөннэммит хостор — бу барыта оҕолорго уонна учууталларга букатын атын эйгэни үөскэтэр. Оҕолор манна үөрэ-көтө кэлэн үөрэнэллэрин, оттон учууталларга үлэлииллэригэр табыгастаах буоларын баҕарабын, — диэн Матта орто оскуолатын дириэктэрэ Антонина Тимофеева бэлиэтээтэ.