Үөһээ Бүлүү улууһун суута уол аатыттан социальнай ситиминэн билсэн баран, албынаталаан байар суолга туруммут Саха сирин олохтооҕо кыыска бириигэбэр таһаарда диэн СӨ сууттарын холбоһуктаах пресс-сулууспата иһитиннэрэр.
Кини социальнай ситимҥэ бэйэтин аатынан буолбакка, толкуйдаммыт уол аатыттан кыргыттары кытта истиҥ сыһыаны олохтоон, материальнай өттүнэн байарга холоммут.
Суут быһаарбытынан, 2022 сыл ыам ыйын 1 күнүттэн 2025 сыл сэтинньи 10 күнүгэр диэри бу кыыс атын дьон итэҕэлин ылан бас билэр малларын уорбут. Кини социальнай ситимнэргэ кыргыттары кытта кэпсэтиэн, билсиэн иннинэ ким-туох буолалларын үөрэппит, кимнээҕи таларын быһааран баран, дьахтар буоларын кистээн, эр киһи буолан кубулунан, истиҥ сыһыаны үөскэппит.
Эмсэҕэлээбит кыргыттар «уолу» таптаан кэбиһэн, харчыларын эрэ буолбакка, атын да малы-салы ыыталлар эбит. Холобура, биир эмсэҕэлээччи монитор атыылаһан баран, сууттанааччы эппит аадырыһыгар ыыппыт. Ол курдук, сууттанааччы кыргыттар баайдарын-дуолларын албыннаан ылан баран, сымыйанан уол өлбүтүн туһунан иһитиннэрэр уонна кинилэри кытта сибээһин быһар эбит.
Онон суут быһаарбытынан, сууттанааччы эмсэҕэлээбит дьон итэҕэлин сиэрэ суох туһанан, уопсайа 120 648 солкуобай суумалаах түөкүннээһини оҥорон, кинилэргэ улахан материальнай хоромньуну таһаарбыт.
Суут мунньаҕын кэмигэр сууттанааччы буруйун толору билиммит, оҥорбут буруйуттан кэмсиммит, буруйдааһыны кытта сөбүлэспит уонна эмсэҕэлээбит дьоҥҥо тахсыбыт хоромньуну барытын толуйбут. Бу дьыалаҕа олоҕуран, Арассыыйа Холуобунай кодексатын 159 ыстатыйатын 2 чааһынан көрүллэр буруйу оҥорбута дакаастанан, суут кинини 2 сыл болдьоххо усулуобунайдык көҥүлүн быһарга, ону тэҥэ 2 сыл тургутар болдьоххо бириигэбэрдээтэ.
Суут бириигэбэрэ сокуоннай күүһүгэр киирэ илик.