Владивостокка XI Илиҥҥи экэнэмиичэскэй пуорумҥа «Уһук Илин уулуссата» быыстапкаҕа, өрүү да буоларын курдук, улахан болҕомтону тардар Саха сирин павильона аһылынна.
Эрэгийиэн сүрүн экспонаттарынан Чурапчы сэлиитэ уонна «Саюрига» сылы эргиччи үүннэриллэр тропическай үүнээйилэр буоллулар. Экспозиция өрөспүүбүлүкэ ураты научнай нэһилиэстибэни уонна креативнай индустриялары дьиҥнээх экэнэмиичэскэй бырайыактарга сатабыллаахтык кубулутарын, Уһук Хоту дойду усулуобуйатыгар даҕаны үрдүк технологиялаах производствоны сайыннарарын дьэҥкэтик көрдөрөр.
Саха сирин павильонугар тардыы сүрүнүнэн сэлиигэ анаммыт зона буолла. Бу эрэгийиэн визитнэй каарточкатынан буоларын сэргэ, креативнай экэниэмикэҕэ интеграцияланар: ювелирнай оҥоһуктартан уонна киэргэллэртэн үөрэх уонна медиа бырайыактарга тиийэ. Ыалдьыттар улахан болҕомтолорун СӨ наукаларын академията билиһиннэрэр Чурапчы сэлиитин экспоната ылар. Ити айылҕа нэһилиэстибэтин аныгы сайдыы драйверыгар кубулутар өрөспүүбүлүкэ күүстээх научнай-чинчийэр кыаҕын тоһоҕолоон бэлиэтиир.
Быыстапка иккис сүрүн улахан үлэтинэн «Тропики в вечной мерзлоте» зона буолла. Манна ыалдьыттар «Саюри» хампаанньа сылы эргиччи тэпилииссэлэригэр үүннэрбит папайя тыыннаах пальмаларын, бананнары уонна да атын итиини таптыыр үүнээйилэри көрүөхтэрин сөп. Бу ааспыт ВЭФ көҕүлээһиннэринэн тирэх ылбыт бырайыак ураты экстремальнай килиимэт усулуобуйатыгар үрдүк технологиялаах тыа хаһаайыстыбатын киллэрии кыаҕын дакаастыыр.
Павильон концепцията эрэгийиэн сайдыытын бары вектордарын хабар. «Инвестируй в Якутию» зона улахан инфраструктуралаах бырайыактары билиһиннэрэр, «Открой Якутию » куйаар туристическай маршруттары билиһиннэрэр. «Якутия – Земля Героев» быыстапка олохтоохтор хорсун быһыыларыгар уонна куттал суох буолуутун аныгы технологияларыгар ананар, онтон Сделано в Якутии» атыы-эргиэн кэккэтэ олохтоох оҥорон таһаарааччылар бородууксуйаларын көрдөрөр.
2015 сыллаахха РФ Бэрэсидьиэнин Уһук Илиҥҥи ФУо боломуочуйалаах бэрэстэбиитэлэ Юрий Трутнев тэрийбит «Уһук Илин уулуссата» быыстапката үгэс курдук, пуорум биир саамай болҕомтону тардар, элбэх киһи кэрэхсээн сылдьар былаһааккатынан буолар. Бу макроэрэгийиэн кэлим сайдыытын дьиҥнээх түмүктэрин көрдөрөр.
—2015 сыллаахха биһиги аан бастаан «Уһук Илин уулуссатын» арыйбыппыт. Онно: «Тоҕо маннык түбүк нааданый? «диэн ыйыталлара. Маныаха биһиги Уһук Илини тоҕо таптыырбытын, тоҕо киэн туттарбытын көрдөрүөхтээхпитин дакаастаатыбыт. Приморьеҕа уонна Хабаровскай кыраайга, Сахалиҥҥа уонна Камчаткаҕа, Саха сиригэр уонна Бурятияҕа инвестициялар тардыллыбыттара, үлэ миэстэтэ тэриллибитэ, тэрилтэлэр тутуллубуттара. Бүгүн бу сыыппаралар биһиги дойдубут бүтүннүүтүн баайа буоллулар: 1118 саҥа тэрилтэ, 6,8 трлн тардыллыбыт инвестиция, 190 тыһ.саҥа үлэ миэстэтэ. Биһиги бииргэ саҥа Уһук Илини тэрийбиппит, — диэн РФ Бырабыыталыстыбатын Бэрэссэдээтэлин солбуйааччы — РФ Бэрэсидьиэнин Уһук Илиҥҥи ФУо боломуочуйалаах бэрэстэбиитэлэ, ВЭФ тэрийэр кэмитиэтин бэрэссэдээтэлэ Юрий Трутнев бэлиэтиир.
XI Илиҥҥи экэнэмиичэскэй пуорум Владивостокка балаҕан ыйын 1-4 күннэригэр ыытыллар. Быйылгы пуорум сүрүн тиэмэтэ — «Уһук Илин — дьон туһугар сайдыы». Тэрээһини тэрийээччинэн РФ Бырабыыталыстыбатын уонна РФ Бэрэсидьиэнин Уһук Илин ФУо боломуочуйалаах бэрэстэбиитэлин аппараатын өйөбүлүнэн Росконгресс пуондата буолар. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.
Сиһилии: https://www.sakha.gov.ru/news/61318