Трансарктическай тырааныспар көрүдүөрэ аан дойдутааҕы таһаҕаһы тиэйиигэ куттал суох буолуутун хааччыйар, Арассыыйа арктическай эрэгийиэннэригэр тохтоло суох таһаҕас тиэрдэр, транзитнай уонна каботажнай таһаҕас таһыытыгар саҥа кыахтары арыйар кыахтаах диэн Арассыыйа бэрэсидьиэнэ Владимир Путин 11-с Илиҥҥи экэнэмиичэскэй пуорум пленарнай мунньаҕар бэлиэтээтэ.
Путин Саха сирин Булуҥ улууһугар баар Тиксии пуорда сылы эргиччи уу суолун уонна тохтоло суох таһаҕас таһыллыытын хааччыйарын туһугар инфраструктурата бөҕөргөтүллүөхтээх сүрүн арктическай кииннэр ахсааннарыгар киллэрдэ.
Хотугу муора суолунан сылы эргиччи уу суолун хааччыйыыны ситиһэргэ ледокольнай уонна быыһыыр флот бөдөҥ тутуута барар, спутнигынан сибээс кэҥиир, пуортары саҥардыы ыытыллар. Бэрэсидьиэн Диксоҥҥа, Певекка, Архангельскайга, Сабеттаҕа, Тиксиигэ пуорт инфраструктуратын сайыннарыыга инники күөҥҥэ тутуллар хайысхаларга барыларыгар үлэ көхтөөхтүк барарын тоһоҕолоото.
«Тиксии-Найба агломерациятын чэрчитинэн Тикси пуордун уонна онно сыһыаннаах логистиканы сайыннарыы арктическай улуустарга таһаҕаһы эрэллээхтик тиэрдиини эрэ хааччыйыа суоҕа, өссө Саха сирин саҥа логистическай ситимнэргэ киллэриэҕэ, үлэ миэстэтин таһаарыаҕа уонна эрэгийиэн кэлим сайдыытын көҕүлүөҕэ», — диэн эппитэ Ил Дархан Айсен Николаев.
Арктиканы сайыннарыы кэлим былаана бигэргэтилиннэҕинэ, муора пуортара тимир суол уонна иһинээҕи уу суолларын терминалларын кытта холбонуохтара. Оччоҕо бу көрүдүөргэ Киин Арассыыйа, Урал, Сибиир таһаҕаһа холбонуоҕа, тас дойдуттан киирэр табаар кэлиитэ хааччыллыаҕа.
Бу уон сыл бүтүүтэ Трансарктическай көрүдүөрүнэн сылга 70 мөл. туоннаттан кырата суох таһаҕас таһыллыаҕа, бу билиҥҥи таһымы икки бүк аһарыаҕа, дойду биир сүрүн маршрутугар кубулуйуоҕа.
СӨ Ил Дарханын уонна Бырабыыталыстыбатын пресс-сулууспата.