Бүгүн, балаҕан ыйын 8 күнүгэр, СӨ Ил Дархана Айсен Николаев уонна Беларусь Өрөспүүбүлүкэтин экэниэмикэҕэ миниистирэ Юрий Чеботарь көрүстүлэр.
Өрүттэр икки өрүттээх оробуочай бөлөх сэттис мунньаҕын иннинэ буолбут түмүктэри таһаардылар уонна Беларусь Өрөспүүбүлүкэтин Бэрэсидьиэнин дьаһалтатын баһылыгын Дмитрий Николаевич Крутовы кытта Илиҥҥи экэнэмиичэскэй пуорум түһүлгэтигэр ситиһиллибит дуогабардары олоххо киллэриигэ инники хардыылары дьүүллэстилэр.
—Сүрүн болҕомтобутун Саха сирин усулуобуйатыгар сөп түбэһиннэриллибит белорусскай тиэхиньикэни аҕалыыны кэҥэтиигэ уонна тимир суол логистикатын сайыннарыыга уурабыт. Үрдүк технология уонна цифровой киинэ прокатын эйгэтигэр бииргэ үлэлээһин кыаҕын туспа көрөбүт, — диэн Айсен Николаев бэлиэтээтэ.
Көрсүһүү сүрүн тиэмэтинэн тиэхиньикэни тиэрдии буолла. Саха сирэ билигин «Товар Союзного государства» статустаах БЕЛАЗ самосвалларыр интэриэһиргиир. Эрэгийиэн саамай бөдөҥ бырамыысыланнай хампаанньалара чопчу бу тиэхиньикэни кытта үлэни инники күөҥҥэ көрөллөр. Маны сэргэ, көрсүһүү кэмигэр пассажирскай, коммунальнай уонна тыа хаһаайыстыбатын тырааныспарын атыылаһыы кэскилэ дьүүллэһилиннэ.
Өрүттэр Минскэйгэ «Саха сирин тимир суолларын» бэрэстэбиитэлистибэтин үлэтин үрдүк көдьүүстээҕин бэлиэтээтилэр. Тимир суолунан тиэрдии, таһыы Саха сиригэр ырыынагы табаардарынан хааччыйыы, тиэрдии болдьоҕун лаппа кыччатар кыахтаммыт.
—Быһа ыытыы, тиэрдии болдьоҕу икки нэдиэлэҕэ диэри кыччатар кыахтанна. Ити Саха сиригэр ас-үөл түргэнник кэлэрин хааччыйар, ону ааһан сибиэһэйдии. Биһиги дэлэгээссийэбит Дьокуускай кэккэ маҕаһыыннарыгар сылдьан, белорусскай табаардар ассортименнара элбэҕин көрдө уонна атыылаһааччылар үчүгэй сыанабылы биэрэллэрин иһиттэ, — диэтэ Беларусь Өрөспүүбүлүкэтин экэниэмикэтин миниистирэ Юрий Чеботарь
Маны таһынан Беларусь Өрөспүүбүлүкэтэ Саха сиригэр алмаас кластерын тэрийиигэ кыттарга бэлэмин биллэрдэ, маныаха «Кристалл» тэрилтэ баай уопутун туһанарга этии киллэрдэ.
Икки эрэгийиэн сыһыаннаһыыларыгар историяҕа киирбит уопсай өйдөбүлү харыстааһын ураты миэстэни ылла.
—Биһиэхэ историяҕа киирбит уопсай өйдөбүлү харыстааһын ураты миэстэни ылар. Гомель уобалаһыгар «Бастионы памяти» мемориальнай бэлиэ аһыллыыта бэлэмнэнэр. Чуолаан онно, сахалартан бастакынан Сэбиэскэй Сойуус Дьоруойун аатын ылбыт Федор Кузьмич Попов көмүс уҥуоҕа көмүллэн сытар. Бу биһиги барыбыт уопсай историябыт, ол өйдөбүлү биһиги өйбүтүгэр-санаабытыгар харыстаан илдьэ сылдьыахтаахпыт, — диэн Ил Дархан Айсен Николаев тоһоҕолоон бэлиэтээтэ. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.
Сиһилии: https://www.sakha.gov.ru/news/62403