Арассыыйа ИДьМ Дьокуускайдааҕы 1 №-дээх полиция отделын дьуһуурунай чааһыгар чааһынай дьиэттэн мал-сал уоруллубутун туһунан сайабылыанньа киирбит. Уопсай хоромньу суумата 170 тыһыынча солкуобай кэриҥэ диэн ИДьМ пресс-сулууспата иһитиннэрэр.
Суһал көрдүүр-ирдиир тэрээһиннэр түмүктэринэн, баайы-дуолу уорууну арыйар отдел холуобунай ирдэбил үлэһиттэрэ урут сууттана сылдьыбыт 48 саастаах олохтоох киһи уорбутун быһаарбыттар.
Биллибитинэн, эр киһи өр кэмҥэ кураанах турбут чааһынай дьиэ таһыгар олорбут. Хас да күн кини ол дьиэни кэтээн көрбүт, онтон иһирдьэ киирэргэ быһаарыммыт. Хаһаайыттар суохтарынан туһанан, эр киһи түннүк форточкатынан дьиэҕэ киирбит уонна болгарканы, икки шуруповерду, турба силимниир өтүүгү, ону тэҥэ радиаторы уоран тахсыбыт. Уоруллубут малы-салы эр киһи бэйэтин көрүүтүнэн дьаһайбыт.
Буруйданааччыга Арассыыйа Холуобунай кодексатын 158 ыст. 2 ч. (Уоруу) холуобунай дьыала көбүтүлүннэ.