Алтынньы 8-11 күннэригэр Дьокуускайга «Сулус» полигонугар, Сэбиэскэй Сойуус Дьоруойа Федор Матвеевич Охлопков аатынан IV-с аармыйатааҕы ырааҕы чопчу ытыыга турнира буолуоҕа. Спортивнай тэрээһин сүрүн судьуйатынан РФ Бырабыыталыстыбатын Бэрэссэдээтэлин солбуйааччы — РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев ананна.
Турнирга бэлэмнэниини Айсен Николаев баһылыктаах тэрийэр кэмитиэт мунньаҕар көрдүлэр.
«Турнир саҕаланыыта биир ыйтан эрэ ордук хаалла. Быйыл турнир аан дойдутааҕы таһымнаныа уонна бастакытын ыччат турнирынан арыалланыа. Кыттааччылар географиялара кэҥээбитэ ырааҕы чопчу ытыыга улахан интэриэс баарын уонна биһиги турнирбыт федеральнай уонна аан дойдутааҕы аренаҕа аптарытыата үрдээн иһэрин туоһулуур», — диэн Айсен Николаев тоһоҕолоон бэлиэтээтэ.
Кыттааччылары көрсүү, күрэхтэһиини, дьыалабыай уонна култуурунай бырагырааманы тэрийии туһунан Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Ольга Балабкина отчуоттаата. Аныгы сэп-сэбиргэл куттала суох буолуутун уонна хараллыытын миэрэлэрин туспа көрдүлэр.
«2026 сылга турнирга 200-тэн тахса киһи кыттыаҕа. Бүгүҥҥү күҥҥэ Саха сириттэн 16 киһи сайаапка биэрбит», — диэн Арассыыйа Дьоруойа, «Сулус» киин салайааччыта Александр Колесов иһитиннэрдэ.
Турнир чэрчитинэн олохтоох оҥорон таһаарааччылар бородууксуйаларын атыылыыр дьаарбаҥканы, оборонаҕа анаммыт сэп-сэбиргэл уонна тэрил быыстапкатын тэрийиэхтэрэ.
Бу улахан спортивнай тэрээһини РФ Бэрэсидьиэнин Уһук Илиҥҥэ боломуочуйалаах бэрэстэбиитэлин аппараата, Саха Өрөспүүбүлүкэтин Бырабыыталыстыбата, Арассыыйа Бойобуой снайпинин федерацията, «Воин» байыаннай-спортивнай бэлэмнэнии киинэ уонна Арассыыйа Бойобуой искусстволарын сойууһа тэрийэллэр.
Сиһилии: https://www.sakha.gov.ru/news/63069