Бу үлэ национальнай бырайыак чэрчитинэн ыытыллар.
Ил Дархан Айсен Николаев Ленскэйгэ «Ойуур» киин паарканы тупсаран оҥоруу иккис түһүмэҕэ хайдах баран иһэрин көрдө. Бырайыак Уһук Илин эрэгийиэннэригэр табыгастаах куорат эйгэтин тэрийии куонкуруһун кыайыылааҕынан буолбута уонна 100 мөл.солк. федеральнай граны ылбыта.
Үлэ «Олох инфраструктурата» национальнай бырайыак «Куорат табыгастаах эйгэтин тэрийии» федеральнай бырайыагынан ыытыллар. Паарка кэнсиэпсийэтин «Море» бюро оҥорбут, «NOMADO» бюро дизайн-бырайыага.
Ил Дархан үлэни-хамнаһы көрөн баран, үрдүктүк сыаналаата уонна паарка оройуоҥҥа эрэ буолбакка, бүтүн өрөспүүбүлүкэҕэ саамай аныгы уопсастыбаннай сирдэртэн биирдэстэрэ буолуоҕун бэлиэтээтэ.
—Манна дьиэ кэргэн сынньанарыгар, күүлэйдииргэ уонна куорат тэрээһиннэрин ыытарга аныгы сир тэриллэр. Бары үлэ үрдүк хаачыстыбалаахтык ыытылларын хааччыйарга уонна үлэни болдьоҕор түмүктүүргэ сорудахтаатым, — диэтэ Айсен Николаев.
Пааркаҕа сценаны, амфитыйаатыры, күүлэйдиир суоллары уонна былаһааккалары оҥороллор. Хачыаллар, ыскамыайкалар, сүрүн аллеяҕа ааркалар уонна «Күн» арт-эбийиэк баар буолуохтара. Фонтан суола пааркаҕа урут тупсарыллан оҥоһуллубут сири кытта ситимниир. Уот-күөс оҥоһуллуо, үүнээйи арааһын олордуохтара. Эбийиэккэ икки бэдэрээтчит үлэлиир. Хантараак икки сылга суоттаммыт, үлэ сүрүн кээмэйин быйылгы сылга толорор былааннаахтар.
Бүгүҥҥү күҥҥэ сири-уоту былааннааһын, бордюрдары оҥоруу уонна сценаҕа, хачыал турар сирин акылаатын оҥоруу түмүктэммит. Тротуар плиткатын 80% ууруллубут, уоту-күөһү оҥоруу үлэтэ 40% толоруллубут, ыскамыайкалары оҥоруу саҕаламмыт.
2026 сылга Саха сиригэр «Табыгастаах куорат эйгэтин тэрийии» федеральнай бырайыагынан барыта 46 тупсаран оҥоруу бырайыага олоххо киирэр, манна Арассыыйатааҕы куонкурус 13 кыайыылааҕын киллэрэн туран. Уһук Илин эрэгийиэннэригэр V куонкуруска Саха сирэ 17 сайаапканы киллэрбитэ, итинтэн алтата кыайыылаах буолбута. Олору олоххо киллэрии 2027 сылтан саҕаланыахтаах.
Бүтүн Арассыыйатааҕы куонкурус 2018 сылтан ыытыллар. Бу кэм устатыгар Саха сирэ 39 кыайыыны ситиспитэ уонна 2,535 млрд солк. федеральнай үбү тардыбыта. Олоххо киирбит эбийиэктэр ортолоругар Бүлүүгэ «Ыллыыр кумахтар» кытылы уоннаТоммокко Алданы көрөр былаһаакканы киэн тутта ааттыыбыт. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.
Сиһилии: https://www.sakha.gov.ru/news/63137
Хаартыскаҕа Андрей Сорокин түһэриитэ, ЯСИА