Саха сирин Ис дьыалаҕа министиэристибэтин Экэнэмиичэскэй куттал суох буолуутун уонна коррупцияны утары охсуһар управление үлэһиттэрэ биисинэһи арыйарга анаммыт бүддьүөт харчытын хорон сиэһин чахчытын быһаардылар.
Барыллан быһаарыллыбытынан, Нерюнгри оройуонун 31 саастаах олохтооҕо дьахтар социальнай дуогабары түһэрсэн, бухгалтерскай өҥөнү оҥорууга биисинэһи арыйарга 221 тыһыынча солкуобайы субсидия быһыытынан ылбыт. Субсидия усулуобуйатынан, уорбаланааччы сыыппара тиэхиньикэтин атыылаһарга үбүнэн-харчынан көмөнү туттуохтаах эбит. Ол эрээри кини анаммыт харчыны сыалын-соругун атыҥҥа, тус наадатыгар бараабыт.
Быһаарыллыбытынан, дьахтар ылсыбыт эбэһээтэлистибэлэрин толорор санаата суох эбит. Түмүгэр оройуон бүддьүөтүгэр улахан хоромньу оҥоһуллубут.
Полиция оройуоннааҕы отделын силиэдэбэтэлэ уорбаланааччы дьахтарга Арассыыйа Холуобунай кодексатын 159.2 ыстатыйатын 1 чааһынан көрүллэр (Төлөбүрдэри ылыыга албыннааһын) холуобунай дьыалатын көбүттэ. Силиэстийэ салҕанар.