Бүгүн, балаҕан ыйын 25 күнүгэр, Ытык Күөл киинигэр улуус олоҕун тупсарар, олохтоохтор духуобунай уонна социальнай сайдыыларыгар туһаайыллыбыт аныгы саҥа таас тутуу аһыллыытын үөрүүлээх сиэрэ-туома буолан ааста.
Таатта улууһун баһылыга Айаал Бурцев саҥа эбийиэк улуус сайдыытыгар улахан хардыы буоларын уонна инфраструктура тупсара тыа сиригэр олох таһымын үрдэтэрин тоһоҕолоон бэлиэтээтэ.
«Бүгүн биһиги улууспут киинигэр өссө биир кэрэ, аныгы таас эбийиэк үлэҕэ киирэр өрөгөйдөөх күнэ үүннэ. Бу — улууспут олохтоохторун, тутууну ыыппыт маастардарбыт уонна судаарыстыбабыт биир күүстээх, сомоҕо үлэтин ситиһиитэ буолар. Инникитин да бары биир сомоҕо буолан, илии-илииттэн сиэттиһэн, төрөөбүт Тааттабыт сайдарын, чэчириирин туһугар күүскэ үлэлэһиэҕиҥ!» — диэн эттэ.
Саҥа тутуу символическай күлүүһүн тутууну үрдүк таһымнаахтык уонна хаачыстыбалаахтык ыыппыт «Монтажник» производственнай кооператив прораба Семен Эляков үөрүүлээхтик уонна эрэллээхтик туттарда.
Ол кэннэ улуус баһылыга Айаал Бурцев саҥа эбийиэккэ киирэр тэрилтэлэр салайааччыларыгар өрө көтөҕүллүүлээх быһыыга-майгыга саҥа үлэ хосторун күлүүстэрин туттартаата.
