Саха сирин үрдүнэн самаан сайыммыт ааста. Бу ааспыт сайын биир тутаах соруга — баар-суох хороҕор муостаах, сыспай сиэллээх баайбытын дьылы туоратарбытыгар сөптөөх оттооһун Хорула нэһилиэгэр уонна Ньурба улууһугар үчүгэй түмүктээх буолла. 30 тыһыынчаттан тахса туонна от биһиги улууска кээһиллэн, кыстыгы этэҥҥэ туоруурбутугар эрэлбит күүстээх буолла.
Уопсайынан даҕаны бэрт сайын ааста. От эрэ буолбатах, сирбит аһа эмиэ бэрткэ үүнэн дьэдьэни, ыт тиҥилэҕин, биэ эмиийин уонна да атын араас отону нэһилиэнньэ хаһаанан быр курдук олорорун тэриннэ. Нэһилиэкпит үлэһит дьоно дьиэ-уот да туттан, пристройдары оҥостон, өрөмүөннэнии, уһаайба иһинээҕи араас тутуулар уо.д.а. бөҕөтүн ыытынна.
Биир сүрүммүт диэн интэринээппит сабылла сыһан баран, өрөмүөннэнэн, хата, быйыл үлэлиир буолбута биһиэхэ үөрүүлээх.
Кэлэр бэнидиэнньиктэн кэлии тустуук оҕолор кэлэннэр, киирэн олохсуйан баралларыгар барыта бэлэм буолла.
Бүгүн Хорула нэһилиэгин үрдүнэн кыстык сирдэригэр күһүҥҥү айаннарыгар хаас үөрэ субу аастылар. Хааста-аар, эһиил эмиэ эргиллээриҥ!
Валерий Иванов, Ньурба улууһун Хорула нэһилиэгэ