Бүгүн Дьокуускайга «Кыайыы 50 сыла» успорт уораҕайыгар өрөспүүбүлүкэтээҕи «Биисинэс-ЭКСПО 2026» быыстапка үөрүүлээхтик аһыллынна.
Тэрээһин 2010 сылтан ыла ыытылларын Урбаан уонна туризм миниистирэ Георгий Андреев быыстапканы арыйыы кэмигэр тоһоҕолоон бэлиэтээтэ.
Бу араас улуустартан бэйэ бородууксуйатын оҥорон таһаарааччылар түһүлгэлэринэн буолбут суолталаах тэрээһиҥҥэ дьон сонун аһы-үөлү, таҥаһы, сувениры, атах таҥаһын уо.д.а. табаары анаан оҥостон атыылаһа, көрө-истэ кэлэр. Тэрийээччилэр бэлиэтииллэринэн, 15 улуустан (ол иһигэр арктическай оройуоннартан) 100-тэн тахса тэрилтэ кыттыыны ыла сылдьар. “Биисинэс ЭКСПО 2026” быыстапкаҕа 70 тэрилтэ бэйэтин бородууксуйатын туруорбут, 30 тэрилтэ кэтэхтэн кыттыыны ылбыт. Быыстапка сүрүн сыала — олохтоох оҥорор тэрилтэлэр бородуукталарын көрдөрүү уонна эргиэн сибээһин кэҥэтии.
Тэрээһин “Эрэгийиэн биисинэһэ. Үүнүү, сайдыы кэмэ” пуорум чэрчитинэн ыытылла турар. Ол да иһин буолуо, бу быыстапкаҕа “Саха сирэ” хаһыат “Сатабыл”, “Бэйэ оҥоһуга” уонна “Оҥорон таһаарыы” рубрикаларга таһаарбыт дьоруойдарбытын хото көрүстүм.
Саамай үөрүүлээҕэ, саҥа бэйэлэрин дьыалаларын саҕалаан эрдэхтэринэ өйөөн суруйбут эбит буоллахпытына, бүгүҥҥү күҥҥэ бу урбаанньыттарбыт атахтарыгар бигэтик турбут дьон буолан биэрдилэр. Холобур, араас суунар, сууйар бородууксуйаны оҥорон таһаарар “Сууйар” (Suuyar) тэрилтэ «Технопарк Якутия» ГАУ резиденинэн саҥа буолан, кыракый хоско куортамнаһан үлэлээн эрдэҕинэ сырдаппыт буоллахпытына, билигин “Сууйар” (Suuyar) бэйэтэ дьоҕус собуоттаммыт. Онон “Үүнүү, сайдыы кэмэ” пуорума диэн сөпкө ааттаммыт эбит.
“Саха сирэ” хаһыат кынаттаабыт дьоруойдара дьоҕус биисинэскэ хаардыы хардыылаан киирбиттэрэ – улахан үөрүү. Онон хаһыаппыт урбаан сайдыытыгар дьоһун кылаатын эмиэ киллэрэ сылдьар.
Ити курдук, хаһыаппыт дьоруойдарын — “Биисинэс-ЭКСПО” көхтөөх кыттааччыларын кытта салгыы билсиэхпит.