Өрөспүүбүлүкэҕэ биэнсийэҕэ тахсыах иннинээҕи саастаах дьоҥҥо «Кадры» национальнай бырайыак чэрчитинэн, маннык быраабыла үлэлиир: үөрэнии иннинэ мэктиэлэммит үлэ дуогабарыгар илии баттаһаллар. Бу туһунан Ил Дархан Айсен Николаев быһа эпиир кэмигэр иһитиннэрдэ.
«Бу ханнык эрэ идэҕэ көннөрү үөрэтии буолбатах, салгыы үлэлииргэ дуогабардаах хат үөрэтии буолар. Өрөспүүбүлүкэ дьарыктаах буолууга кииннэригэр хат үөрэтии үлэтэ билигин итинник тэриллэр. Маннык хат үөрэммит дьонтон 90%-рын кэриҥэ бэриллэр үлэ миэстэтигэр сөбүлэһэр», — диэтэ Айсен Николаев.
Ил Дархан дойдуга да, өрөспүүбүлүкэҕэ да үлэтэ суох буолуу хаһааҥҥытааҕар да муҥутуур намыһах таһымҥа сылдьарын бэлиэтээтэ. Өрөспүүбүлүкэҕэ үлэтэ суох буолуу таһыма 3,8%-ҥа тэҥнэһэр. Ону сэргэ араас хайысхалаах тэрилтэлэргэ каадырга наадыйыы улахан.
Бүгүн өрөспүүбүлүкэҕэ үлэ ырыынагар балаһыанньа бигэ туруктаах, оттон хамнас орто кээмэйэ намтаабат. Билигин өрөспүүбүлүкэҕэ 9 тыһыынча кэриҥэ вакансия баар.