Алтынньы бастакы бэнидиэнньигэр Аан дойдутааҕы архитектура күнэ бэлиэтэнэр — бу куораттар уонна сэлиэнньэлэр тас көстүүлэрин тупсарар, олорорго табыгастаах оҥорор дьон идэлээх бырааһынньыктара. Саха сирин Бырабыыталыстыбатын Бэрэссэдээтэлин бастакы солбуйааччытын эбээһинэһин толорооччу Николай Бочков бу эйгэ үлэһиттэрин эҕэрдэлээтэ уонна кинилэр өрөспүүбүлүкэ сайдыытыгар киллэрэр кылааттарын бэлиэтээтэ.
«Маны тэҥэ архитектура — дьиэлэр-тутуулар эрэ буолбатах, бу тулалыыр эйгэ эмиэ буолар. Хас биирдии тупсаҕай искибиэр, болуоссат эбэтэр кытыл кэннигэр төрөөбүт Сахабыт сирин тас көстүүтүн айар архитектордар, проектировщиктар, тутааччылар уонна дизайнердар сыралаах үлэлэрэ турар», – диэн бэлиэтээтэ Николай Бочков.
Кини бэлиэтээн эппитинэн, 2018 сылтан өрөспүүбүлүкэҕэ «Олоххо-дьаһахха инфраструктура» национальнай бырайыак «Куорат тупсаҕай эйгэтин тэрийии» федеральнай бырайыагын чэрчитинэн 153 уопсастыбаннай эйгэ тупсарылынна. Бу — олохтоохтор сөбүлээн сылдьар саҥа искибиэрдэрэ, болуоссаттара, кытыллара, оҕо уонна успуорт былаһааккалара. Бу үлэ салҕанар. Быйыл өссө 46 маннык сири тупсарар былааннаахтар.
Санатан эттэххэ, ахсынньы 1-2 күннэригэр Дьокуускайга «ДальАрх» диэн бастакы национальнай Уһук Илиннээҕи архитектура бириэмийэтин кыайыылаахтарын наҕараадалыыр үөрүүлээх сиэрэ-туома уонна дьыалабыай бырагыраамата ыытыллыаҕа. Бу бириэмийэ Уһук Илин бары 11 эрэгийиэниттэн 300-тэн тахса бырайыагы түмтэ. Бириэмийэ Уһук Илин куораттарыгар барар уларыйыылар далааһыннарын көрдөрөр, архитектураҕа уонна куораты тутууга саҥа идэлээх стандарттары олохтууру, ону тэҥэ архитектордары, девелопердары, судаарыстыбаннай уонна муниципальнай хамаандалары сомоҕолуур соруктаах. Бириэмийэ 10 номинациятыттан үксэ олоххо киирбит уонна олоххо киирэ илик бырайыактарга туспа куонкурустары көрөр. «ДальАрх» бириэмийэ 2025 сыллаахха Илиҥҥи экономическай форум кэмигэр Уһук Илин уонна Арктика сайдыытын корпорациятын уонна Саха Өрөспүүбүлүкэтин Бырабыыталыстыбатын көҕүлээһиннэринэн олохтоммута. Бу тэрээһини Арассыыйа Уһук Илини сайыннарыыга министиэристибэтэ, РФ Тутууга министиэристибэтэ уонна ДОМ.РФ өйүүллэр, оттон операторынан «ЦЕНТР» стратегическай сайдыы ааҕыныстыбата буолар.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата
Сиһилии: https://www.sakha.gov.ru/news/65443