Сэбиэскэй Сойуус Дьоруойа Ф.М. Охлопков кэриэһигэр анаммыт IV Аан дойдутааҕы байыаннай үрдүк кылаастаах ытыы күрэҕэр саҕаланан, араас эрэгийиэннэртэн 187 ытааччы уонна 27 судьуйа, ону тэҥэ Беларусь Өрөспүүбүлүкэтин хамаандата кэлэн кытта сылдьаллар.
Күрэхтэһиигэ аан бастакытын, биир дойдулаахпыт, «Мюрей» диэн позывнойдаах байыас кэлэн кытта сылдьар. «Мюрей» күрэхтэһии киниэхэ атын кыттааччылары кытта билсэргэ уонна аан дойдутааҕы таһымҥа тэрээһин хайдах ыытылларын көрөргө кыаҕы биэрэр диир. Кини аан дойдутааҕы таһымнаах күрэхтэһиигэ аан бастакы уопутун туһунан маннык кэпсиир:
«Мин Дьокуускайтан сылдьабын. Былырыыҥҥы турнирга кыайан кэлбэтэхпит, оттон быйыл эрдэттэн бэлэмнэммиппит. Саха сиригэр анаан эрдэ кэлэн бэлэмнэммиппит. Мин бинтиэпкэм СВ-98, «Калашников» концерныгар ооҥоһуллубута. Арассыыйа үрдүкү кылаастаах чопчу ытыыга снайперскай бинтиэпкэ. Биһиги бэйэбит дойдубутугар оҥоһуллар табаары өйүүбүт, судургу, өйдөнүмтүө, онон үчүгэй. Хас биирдии ытыыгар син биир улахан болҕомтоҕун уураҕын. Бу саабынан биир сыл үлэлээтим, 1000 м судургутук ытар. Ботуруоннарбытын бэйэбит оҥостубуппут, элбэхтик бэлэмнэммиппит. Турнир аан дойдутааҕы таһымнаммыта элбэҕи этэр, үрдүк таһымнаах. Манна кыттаммыт биһиги атын дойдулар кыттааччыларын кытары билсиһэбит, уопут атастаһабыт».