Саха сиригэр балаҕан ыйын 14 күнүттэн саҕаламмыт кирииптэн утары быһыыны биэрии үлэтэ эрчимнээхтик салҕанар. СӨ Доруобуйа харыстабылын министиэристибэтэ иһитиннэрэринэн, алтынньы 8 күнүнээҕи туругунан 150 095 киһи быһыыны ылбыт. Ол иһигэр 74 484-дэ оҕо, оттон 75 611-э улахан киһи.
Өрөспүүбүлүкэ үрдүнэн 433 быһыылыыр биригээдэҕэ тыһыынчаттан тахса медүлэһит сыста сылдьар. Билиҥҥи туругунан 282 690 доза быһыы кэлэн турар, өссө да кэлиэхтээх. Быйыл уопсайа 425 тыһыынчаттан тахса киһини быһыылыыр былааннаахтар. «Грипп — бу дьыл кэминээҕи көннөрү ыарыы буолбатах, кини киһи доруобуйатыгар ыар содуллаах буолуон сөп. Вакцинация бу кутталы аҕыйатарга уонна доруобуйаны харыстыырга көмөлөһөр. Чугас дьоҥҥут — оҕолоргут, кырдьаҕастаргыт эбэтэр хроническай ыарыылаах дьон баар буоллахтарына, быһыыны хойутаппакка ыларгытыгар сүбэлиибин. Бэйэҥ доруобуйаҕын харыстаныы — бу чугас дьоҥҥун кыһаллыы буолар», — диэн бэлиэтээтэ СӨ Доруобуйа харыстабылын миниистирэ Лена Афанасьева.
Быһыыны олорор сиргинэн поликлиникаҕа, ону таһынан оскуолалар, уһуйааннар уонна үөрэх тэрилтэлэрин медкэбиниэттэригэр босхо биэрэллэр. Быһыыны ыларга «Госуслуги» портал нөҥүө, поликлиника регистратуратыгар эбэтэр контакт-кииҥҥэ (122) эрийэн суруттарыахха сөп. Доруобай буолуҥ.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата