Алтынньы 3 күнүгэр буолбут «Олоҥхо- баттл» күрэһин «Саха» НКИХ социальнай ситимҥэ таһаарбытын бүгүн, дьэ өрөөн олорон анаан көрдүм.
Ыччаттарбыт, эчи, талааннарын. Барыларын астына көрдүм. Бииртэн биир үчүгэй. Арааһа, хас да түһүмэҕинэн сорудах ылан кыттан, ким эрэ туораан, биир сүрүн кыайыылаах тахсара буолуо.
Манна ыытааччыттан саҕалаан, биһиги «Оһуохай» түмсүүбүт ыччаттара кытта сылдьалларыттан үөрдүм. Дархан этээччибит Станислав Иванов биэриини хомусчут, артыыс Василина Шариналыын олус ылбаҕайдык саҥаран-иҥэрэн ыыталлар. Станислав Иванов бэйэтэ олоҥхоһут буолан, хас биирдии кыттааччы толорбут айымньытын билэрэ сөхтөрөр. Бу күрэскэ биһиги киэн туттар эдэркээн, кэскиллээх этээччилэрбит Эрик Егоров, Сайаана Шамаева, Кондратий Герасимов, Марфа Аммосова кытта сылдьаллар. Салгыы кыттыахтара диэн эрэл баар. Маны сэргэ, Горнайтан Айтал Винокуровы, Амматтан Зинаида Бураеваны көрөөччү быһыытынан олус сэргээтим. Кинилэр манна кыттыылара оҕо саастарыттан ыллыы-туойа үөрэммиттэрин, сайдыбыттарын туоһута.
Марта Николаева
Хаартыска: Марта Николаева тиксэриитэ