Балаҕан ыйын 26 күнүнээҕи туругунан, өрөспүүбүлүкэ олохтоохторуттан Ил Дархан Айсен Николаевтыын «Быһа сибээскэ» 550-тэн тахса ыйытыы киирдэ. Тэрээһин Саха Өрөспүүбүлүкэтин Судаарыстыбаннаһын күнүгэр Дьокуускай кэминэн киэһэ 18:00 чааска буолуоҕа. Бу туһунан Саха Өрөспүүбүлүкэтин Эрэгийиэни салайыы киинин (ЦУР) салайааччыта Василий Десяткин иһитиннэрдэ.
«Ыйытыылар ис хоһоонноро дьону туох долгутарын, ордук тыын суолталаах тиэмэлэри мэлдьи көрдөрөр. Бастакы миэстэҕэ суол-иис туруга уонна олохтоохтору тырааныспарынан хааччыйыы (уопсастыбаннай тырааныспар уонна өрөспүүбүлүкэ иһинээҕи авиация үлэтэ) сылдьар. Иккис миэстэҕэ — ититии уонна олорор дьиэ-уот фондатын кыһыҥҥы кэмҥэ бэлэмнээһин. Үһүс миэстэҕэ олорор дьиэни тутууга уонна хаарбах дьиэттэн көһөрүүгэ сыһыаннаах ыйытыылар бааллар. Төрдүс миэстэни өрөспүүбүлүкэ куораттарын уонна сэлиэнньэлэрин тупсарыы (благоустройство) ылар. Бэһис миэстэҕэ — олохтоохтор сорох араҥаларыгар уонна кинилэр дьиэ кэргэттэригэр социальнай көмөнү оҥоруу. Алтыс миэстэҕэ доруобуйа харыстабылын боппуруостара сылдьаллар», — диэн Василий Десяткин бэлиэтээтэ.
Саамай элбэх ыйытыы Дьокуускай куорат, Өймөкөөн, Алдан, Лиэнскэй, Нүөрүҥгүрү, Мииринэй, Өлүөхүмэ, Уус Майа, Аллараа Халыма уонна Хаҥалас улуустарын олохтоохторуттан киирдэ.
Санатан эттэххэ, Саха сирин олохтоохторуттан Айсен Николаевтыын «Быһа сибээскэ» ыйытыылар маннык ньымаларынан ылыллаллар:
– 8 (4112) 506-006 нүөмэринэн;
– Телеграмҥа MAX @voprosglaveyakutii_bot чат-ботунан;
– «Айта» сыыппара көмөлөһөөччүтүн нөҥүө 8 (4112) 510-000 төлөпүөнүнэн.
Ыйытыылар 2024 сыл балаҕан ыйын 27 күнүн киллэрэн туран, быһа эфир түмүктэниэр диэри тутулуллаллар.
Айсен Николаевтыын «Быһа сибээс» трансляцията балаҕан ыйын 27 күнүгэр киэһэ 18:00 чаастан «Якутия 24», Саха НКИК, «Россия 24» телеканалларга, «Тэтим», «Радио России», «Виктория Саха», «СТВ-радио» араадьыйа станцияларыгар, ону тэҥэ Ил Дархан социальнай ситимнэрин официальнай страницаларыгар көстүөҕэ уонна иһиллиэҕэ.