Байыаннай дьайыы бэтэрээннэрэ «Аҕа дойдуну көмүскээччилэр» пуонда Саха сиринээҕи филиалын социальнай координатордара Екатерина Перевалова уонна Александр Пермяков көмөлөрүнэн, Бэстээх орто оскуолатын баазатыгар сыл ахсын ыытыллар байыаннай хомуурдар үөрүүлээх аһыллыытыгар кытыннылар.
Оскуола оҕолоругар анаан аһаҕас успуорт былаһааккатыгар көрдөрүү тэрээһинин тэрийдилэр. Оҕолорго анал тиэхиньикэ кыахтарын, быыһыыр, саахалы суох гынар тэрил үлэтин уонна баһаарынай массыына сэбин-сэбиргэлин көрдөрдүлэр. Уолаттар уонна кыргыттар түргэҥҥэ байыаннай таҥаһы кэтэн, онтон ылбыт сатабылларын бойобуой бэлэмҥэ тургутууга эстэпиэтэҕэ чиҥэттилэр.
Бу хомуур кэмигэр үрдүкү кылаас оҕолоро строй бэлэмнэниитин, ытыыны, тактическай уонна мэдиссиинэ бэлэмнэниитан баһылыыллар. Бу кинилэргэ туһалаах үөрүйэхтэри биэрэр, түмсүүлээх буоларга, хамаанданан үлэ суолтатын билэргэ, доҕотторун уонна Аҕа дойду иннигэр иэстэрин өйдүүргэ үөрэтэр.
Саха сиригэр байыаннай дьайыы кыттыылаахтарын социальнай адаптациялааһыҥҥа уонна уопсастыбаннай олоххо кытыннарыыга улахан болҕомто ууруллар. Ил Дархан Айсен Николаев Ил Түмэҥҥэ туһаайан этиитигэр байыаннай дьайыы кыттыылаахтарын байыаннай сулууспаны ааһар, ууратыллар, төлөбүрдэри уонна өйөбүл миэрэлэрин ылар кэмнэригэр олохторун-дьаһахтарын боппуруостарын быһаарыы былаас бары уорганнарыттан уонна идэлээх тэрилтэлэртэн эппиэтинэстээх үлэни эрэйэрин бэлиэтээбитэ.
«Буойуттары эйэлээх олоххо төннөрүү, социальнай өттүнэн чөлүгэр түһэрии уонна үөрэтии боппуруостарыгар ураты болҕомто наада. Бу – үөрэх уонна үлэнэн хааччыйыы, уопсастыбаннай олоххо кытыннарыы», – диэн Айсен Николаев эппитэ.