Сыл саҕаланыаҕыттан 1,4 тыһыынчаттан тахса дьиэ кэргэҥҥэ үһүс оҕо төрөөбүт, оттон төрдүс уонна онтон кэлэр оҕо — 1 348 ыалга. Кинилэргэ барыларыгар «Дьиэ кэргэн» диэн өрөспүүбүлүкэтээҕи ийэ хапытаала бэриллэр, кээмэйэ — 316 200 солкуобай.
«Биһиги «Дьиэ кэргэн» өрөспүүбүлүкэтээҕи ийэ хапытаалын үһүс эрэ оҕо төрөөтөҕүнэ буолбакка, төрдүс уонна хас биирдии кэлэр оҕо төрөөтөҕүнэ эмиэ биэрэр туһунан быһаарыыны ылынныбыт. Биһиги элбэх оҕолоох дьиэ кэргэттэри өй-санаа да, үп-харчы да өттүнэн өйүөхтээхпит. Үһүс оҕо төрөөтөҕүнэ, судаарыстыбаттан итинник өйөбүлү ылалларын курдук, кэлэр оҕолор эмиэ итинник өйөбүлүнэн туһаналлара сөптөөх дии саныыбын», – диэн Айсен Николаев балаҕан ыйын 27 күнүгэр быһа эпиир кэмигэр бэлиэтээтэ.
2025 сыл тохсунньу 1 күнүттэн ыаллар «Дьиэ кэргэн» өрөспүүбүлүкэтээҕи ийэ хапытаалын үһүс эрэ оҕо төрөөтөҕүнэ буолбакка, төрдүс уонна хас биирдии кэлэр оҕо төрөөтөҕүнэ эмиэ ылаллар. Ол аата, ыал үһүс оҕотугар төлөбүрү туһанан бүппүт да буоллаҕына, төрдүс оҕо төрөөһүнэ бу өйөбүл миэрэтигэр саҥа, толору быраабы биэрэр.
Өрөспүүбүлүкэҕэ 2022 сылтан оҕо төрөөтөҕүнэ «Үйэ оҕолоро» диэн сыаллаах хапытаал бэриллэр. Бу өйөбүлүнэн номнуо 55 тыһыынча кэриҥэ ыал туһанна. Ааспыт сылга эрэ бу маннык быраабы 5 тыһыынчаттан тахса ыал ылла. 2026 сылга төлөбүр кээмэйэ 116 756 солкуобайга тэҥнэһэр.
Ыаллар бу үптэрин наадыйар малларын ыларга тутталлар. Ордук элбэхтик олорор усулуобуйаларын тупсарыыга уонна массыына атыылаһарга туһаналлар. Ону тэҥэ, үп оҕону үөрэттэриигэ, дьиэни гаастааһыҥҥа, оннооҕор оҕо аатыгар баан кылаатын арыйыыга төлөнөр. Ылыы мэхэньиисимэ муҥутуурдук судургутуллан оҥоһуллубут.
Хапытаал сайабылыанньата суох, социальнай көмүскэл уорганнарыгар сылдьыбатахха да, ананар. Арассыыйа гражданина буолуохха, Саха сиригэр регистрацияланыахха уонна ЗАГС-ка оҕо төрөөбүтүн туһунан сибидиэтэлистибэни ылыахха наада. Систиэмэ барытын бэйэтэ оҥорон таһаарар.