Ленскэй оройуонун Чамча нэһилиэгин олохтооҕо Жанна Афанасьева иһитиннэрбитинэн, нэһилиэккэ киирии аартык оһуора таҥнары оҥоһуллубут. Онуоха көхтөөх Надежда, Радий Симоновтар дьиэ кэргэттэрэ бу сыыһаны-халтыны көннөрөн нэһилиэк олохтоохторун үөрдүбүттэр. Бу туһунан Жанна Афанасьева санаатын үллэһиннэ.
— Нэһилиэкпит аартыгын оһуора таҥнары иилиллэн турара олохтоохтор харахтарын аалара. Тоҕо эрэ ким да бу оҥоһуллубут сыыһаны көннөрөргө кыһамматаҕа. Таҥнары оһуор кэхтии, самныы курдук өйдөбүлү үөскэтэр. Бу аартыгынан чамчаҕа эрэ буолбакка, элбэх сиргэ ааһаллар. Надежда Симонова көннөрөр туһунан этэ сатаан баран, аартык сирин-уотун аһатан, көрдөһөн баран оһуору кэргэнинээн көннөрөргө быһаарыммыттарын биһиги олохтоохтор олус хайҕыы санаатыбыт. Маннык көхтөөх, сахалыы сиэри-туому тутуһар, суолта уурар дьон баара үчүгэйин, түгэнинэн туһанан Надеждалаах Радийга махталбытын биллэрэбит.
