Дьокуускай куоракка 33 ыал 158 оҕону иитэр, өссө 721 оҕо эппэкиин уонна попечителлар дьиэ кэргэттэригэр олорор. Ол туһунан Дьокуускай куорат уокуруктааҕы дьаһалтатын эппиэкэҕэ уонна попечительствоҕа департаменын начаалынньыга Оксана Максимова «Актуальное интервью» биэриигэ иһитиннэрдэ.
Кини эппитинэн, оҕону дьиэ кэргэҥҥэ ылыы – бастакы эрэ түһүмэх. Салгыы исписэлиистэр оҕону иитэ ылар дьиэ кэргэттэргэ көмөлөһөллөр, быраап, социальнай уонна психология өттүнэн көмөнү оҥороллор. Департамеҥҥа эппэкиин уонна оҕону дьиэҕэ иитэ ылар дьиэ кэргэттэри кытары быһаччы үлэлиир туспа подразделение баар.
«Подразделениеҕа уокуруктарга уонна учаастактарга сыһыарыллыбыт 13 исписэлиис үлэлиир. Хас биирдии эппэкиин уонна оҕону дьиэҕэ иитэ ылбыт төрөппүт бэйэтин кураторын билэр уонна ханнык эмэ ыйытыы үөскээтэҕинэ, кинини кытары түргэнник сибээстэһэр кыахтаах”, — диэн Оксана Максимова кэпсээтэ.
2020 сыл олунньутугар Дьокуускайга эппэкииннэр уонна попечителлар сэбиэттэрэ тэриллибитэ. Атырдьах ыйын 1 күнүнээҕи туругунан, судаарыстыбаннай тэрилтэлэргэ 89 оҕо баар. Эппиэкэ уорганнарын биир дьоһун суолталаах соруктарынан иккистээн тулаайах хаалыыны сэрэтии буолар. Онуоха сэрэтэр үлэни ыытар уорганнары кытары холбоһуктаах үлэ ыытыллар, дьиэ кэргэттэри кытары сибээс быһыллыбат.
Департамен боломуочуйаларыттан биирдэстэринэн тулаайах уонна төрөппүт көрүүтэ-истиитэ суох хаалбыт оҕолор испииһэктэрин оҥоруу буолар. Сибидиэнньэлэр сыл аайы бэс ыйын 5 күнүгэр диэри Үлэ уонна социальнай сайдыы министиэристибэтигэр ыытыллаллар. 23 саастарын туолбут дьон олорор дьиэ сэртипикээтин ылар кыахтаналлар.
Эппэкиин буолуохтаах уонна оҕону иитэ ылыахтаах дьон бастаан эппиэкэ уонна попечительство департаменыгар кэлэллэр. Кэпсэтии кэнниттэн кинилэргэ оҕону иитэ ылар төрөппүттэр оскуолаларыгар направление уонна наадалаах докумуоннары биэрэллэр. Ол кэнниттэн исписэлиистэр кинилэр олорор усулуобуйаларын үөрэтэллэр уонна быһаарыы ылаллар.
СӨ Ил Дарханын уонна бырабыыталыстыбатын пресс-сулууспата