Быйыл сайын Мэҥэ Хаҥалас улууһун Доллу нэһилиэгэр сайылыктарга күргүөмнээхтик, тэрээһиннээхтик көспүттэр.
Ол курдук, бэл, Ньукуолун иннинэ Дьаамҥа 9 ыал көспүт. Кинилэр 100 сүөһүнү үүрэн таһаарбыттар. Биэс ыанньыксыты кытта бостуук, асчыт эмиэ сайылыкка таҕыстылар.
Эбэ түгэҕэ диэн сайылыкка эмиэ биэс ыанньыксыт сүүс ынаҕы ыаҕа. Онон манна сэттэ ыал көһөн, сайылыы олороллор. Хомус диэн сайылыкка 150 ньирэй сайылыаҕа, кыстыкка уойан-тотон киириэҕэ. Онон түөрт ыал көһөн тиийэн, Хомус сэргэхсийдэ, ньирэй мэҥирээһининэн туолла.
Бу туһунан Мэҥэ Хаҥалас улууһун Тыа хаһаайыстыбатын управлениетын зоотехнига Лилия Пономарева олохтоох тыа хаһаайыстыбатын исписэлииһиттэн иһитиннэрии ылан ыытта.
Хаартыска: архыып