Мииринэй улууһугар Аҕа дойду буойуннарын дьиэ кэргэттэрин кэмитиэтэ байыаннай дьайыы бэтэрээннэрин кытта бииргэ тэрийбит тэрээһиннэрэ буолан аастылар. Бу туһунан брифинг кэмигэр кэмитиэт Мииринэйдээҕи координатора Елена Розова иһитиннэрдэ.
Мииринэй куоратыгар Ирээлээх өрүс кытылыгар байыаннай сулууспалаахтар оҕолоругар анаан көхтөөхтүк сынньанар бырагыраама ыытылынна. Кыттааччылар хамсаныылаах оонньууларга күрэхтэстилэр, мэһэйдэри туоруур балаһаны аастылар уонна поход олоҕун-дьаһаҕын кытта билистилэр. Тэрээһини ыытыыга байыаннай дьайыы бэтэрээннэрэ көмөлөстүлэр.
«Күннээҕи бырагыраама олус баай ис хоһоонноох буолла: оҕолор хамсаныылаах оонньууларга кытыннылар, мэһэйдээх балаһаны туораатылар уонна походнай аһы амсайдылар. Бу тэрээһин көхтөөхтүк сынньанарга эрэ буолбакка, көлүөнэлэр икки ардыларынааҕы ситим бөҕөргүүрүгэр улахан суолталаах буолла. Мэһэйдээх балаһаны ааһар кэмҥэ бэтэрээннэр бэйэлэрин уопуттарынан, олохторун кэпсээннэринэн үллэһиннилэр, оҕолорго кынат биэрдилэр уонна ыарахан тургутуулар да кэннилэриттэн олоххо үөрүүнү булуохха сөбүн көрдөрдүлэр», — диэн кэмитиэт Мииринэйдээҕи координатора бэлиэтээтэ.
Ону таһынан, өрөбүл күннэргэ «Честь имею» байыаннай-патриотическай лааҕырга Арассыыйа Федерациятын Уопсастыбаннай балаатата устубут «Перед судом истории: Курск. Последняя битва» диэн документальнай киинэтин көрдөрүү буолла. Манна 50 саас ситэ илик оҕо кытынна. Елена Розова этэринэн, маннык тэрээһиннэр устуоруйа өйдөбүлүн харыстыырга уонна ыччат сынньалаҥын туһалаахтыы тэрийиигэ туһаайыллаллар.
«Киинэни көрөн баран, оҕолор патриотизм уонна гражданскай эппиэтинэс суолтатын туһунан санааларын үллэһиннилэр. Маннык тэрээһиннэр оҕолорго сөптөөх сыаннастары — Ийэ дойдуну таптыырга, дьиэ кэргэни убаастыырга уонна үгэстэргэ бэриниилээх буолууну иҥэрэргэ көмөлөһөллөр», — диэн кини тоһоҕолоон эттэ.
Маны таһынан, Мииринэй улууһун баһылыга Александр Басыров улуус оҕолоругар сайыҥҥы чэбдигирдэр «Орленок» лааҕырга путевкалары туттарда. Путевканы ылбыттар үксүлэрэ — байыаннай дьайыы кыттыылаахтарын оҕолоро.
Путевкалар Мииринэй улууһун бүддьүөтүгэр көрүллүбүт муниципальнай бырагыраамалар үбүлээһиннэринэн, ону тэҥэ «АЛРОСА» АХ кыттыгас үбүлээһининэн атыылаһыллыбыттар. Туттарыы үөрүүлээх быһыытыгар-майгытыгар Александр Басыров оҕолору уонна кинилэр төрөппүттэрин сайыҥҥы өрөбүл саҕаламмытынан эҕэрдэлээтэ уонна үчүгэйдик сынньаналларыгар баҕарда.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата
Сиһилии: https://www.sakha.gov.ru/news/52503