Саха сирин улуустарыттан 100-тэн тахса эдэр исписэлиис, ону тэҥэ Магадан уонна Камчатка уобаластарын, Карелия Өрөспүүбүлүкэтин уонна Москуба бэрэстэбиитэллэрэ «Единство народов — стратегия развития Дальнего Востока и Арктики» IV Николаевскай форумҥа кытыннылар.
Саха Өрөспүүбүлүкэтин бастакы Бэрэсидьиэнэ Михаил Николаев кэриэһигэр анаммыт форум балаҕан ыйын 30 күнүттэн алтынньы 2 күнүгэр диэри Хаҥалас улууһун Чапаево сэлиэнньэтигэр буолла уонна аан бастаан эрэгийиэннэр икки ардыларынааҕы статуһу ылла.
Үс күн устата кыттааччылар технологическай тутулуга суох буолуу, экэниэмикэ сайдыыта, норуоттар икки ардыларынааҕы алтыһыы, каадыр кыаҕа уонна социальнай бырайыактааһын боппуруостарын ырыттылар. Форум үөрэххэ бииргэ үлэлэһээччитинэн «Билии» Арассыыйатааҕы уопсастыба буолла. Тэрээһин бырагырааматын сүрүн хайысхаларыттан биирдэстэринэн «Росмолодёжь.Гранты» куонкурус буолла, кыттааччылар манна бэйэлэрин көҕүлээһиннэрин өйөбүлүгэр тиксиэхтэрин сөп.
Форум бүтэһик күнүгэр эдэр исписэлиистэр иннилэригэр Саха сирин бырамыысыланнаһын миниистирин эбээһинэһин толорооччу Михаил Кириллин, өрөспүүбүлүкэ экэниэмикэтин миниистирин бастакы солбуйааччыта Иван Елисеев уонна Саха сирин Кэлэр көлүөнэлэрин пуондатын генеральнай дириэктэрэ Владимир Егоров тыл эттилэр.
Тэрээһин бырагыраамата форум бары тиэмэ хайысхаларын кыттыылаахтарын бырайыактарын көмүскээһининэн түмүктэннэ.