Алтынньы 2 күнүгэр бибилэтиэкэр Туяра Борисова «Аал уот» сааһырбыттар түмсүүлэрин сүбэтин тэрийиитинэн, Уйана алгыһынан, Надежда Лыткина тойугунан, чуораан чугдаарар тыаһынан дьоро чаас аһылынна.
Тэрээһин арыылаах алаадьынан алгыстанан, олохтоох дьаһалта, Мария Петухова спонсордаабыт минньигэс төгүрүк остуолун тула олорон, инники үлэни торумнааһынынан, этиилэри истиинэн, саҕаланна.
Туяра Иннокентьевна умнуган буолууну бопсорго, болҕомтолоох буолууга интэриэһи тардар араас тест- оонньуулары ыытта. «Аал уот» салайааччыта Уйана өй-санаа үлэтэ чөл буоларыгар тарбаҕынан эрчиллиилэри оҥорорго үөрэттэ. Агафья Перевалова түргэн өйүнэн араас суоттааһыннарга тэҥнээҕин булбата. Бэл, ырыа айан ыллаата. Түмсүү бастыҥ ырыаһыта, аҕыс уончалаах эбээ, хос эбээ Людмила Олесова элбэх ырыаны билэрэ сөхтөрдө. Дария Бурнашева сытыы өйүнэн садаанньалары түргэнник толорорун хайҕаатым. Түмсүүгэ сүрүннээн 70-80 саастаахтар кэлбиттэр. Билигин дойду доруобуйатын харыстабылыгар болҕомтоҕо ылыллар умнуган буолуу, түөһэйии тула кэпсэтии, сэрэтии сүбэлэрэ болҕомтону тартылар. Түмүккэ бэл, торуоскалары умнан туран, Надежда Лыткина таһаарыытынан оһуохайдаатыбыт.
Тэрээһин кыттыылаахтара маннык түмсэр кырдьар сааһы бытаардарын, улахан суолталааҕын этэн, махталларын биллэрдилэр. Ол курдук, өр сыл сэбиэт сэкирэтээринэн үлэлээбит Екатерина Аржакова: «Мин куораттан аны дойдубар кыстыырга быһаарынан тахсыбытым. «Аал уоттар» түмсүүлэригэр сылдьан, олус астынан, дуоһуйан ыарыыбын умуннум. Барыта бырагырааманан ыытыллыбыт бастакы тэрээһинтэн олус үөрдүм», — диэтэ.Онтон саамай аҕа саастаахпыт, 80 көрсөр Анна Прокопьевна Стручкова: «Маннык сотору-сотору аралдьыйар, сынньанар буолуоҕун», — диэтэ.
Түмсүү актыыба: солбуйааччы Галина Олесова, Мария Алексеева, Надежда Лыткина, Туяра Борисова элбэх ыалдьыттанан сүргэлэрэ көтөҕүлүннүлэр. Салгыы араас тэрээһин, дьиэлэринэн сылдьан билсиһии, тэрилтэлэр бэтэрээннэрин кытары көрсүһүүлэрэ, маастар- кылаастар ыытыллыахтара.
Ульяна БУРНАШЕВА-УЙАНА, уопсастыбаннай кэрэспэдьиэн